Ааптар оҕону кыра сааһыттан хара үлэҕэ үөрэтии ыччаты олоххо бэлэмниирин туһунан суруйбутун сэҥээрэн, киин куорат олохтооҕо, үлэ бэтэрээнэ Мария Сергеева маннык суруйда:
-- Михаил Иванов оҕону кыра сааһыттан илии хара үлэтигэр үөрэтэн, олоххо сыһыаран иитэр туһунан саамай сөпкө суруйбут. Ону биһирээммин, куоракка олорор сиэннэрбитин хайдах үлэҕэ үөрэппиппит туһунан кэпсиэхпин баҕарабын. Баҕар, кимиэхэ эмит туһалыа, өй угуо диэн. Билигин үгүс төрөппүт ипэтиэкэ төлөбүрүгэр ыктаран, үлэнэн эрэ олорор, онон оҕону суотабай төлөпүөн иитэр диир омуна суох. Биһиги икки улахан сиэммит (куорат оскуолатын үөрэнээччилэрэ) тыаҕа олорор эһэлээх эбэлэрэ (аҕаларын дьонноро) сүөһүлээх кэмнэрин баттаһа, күһүн идэһэ этин бэриһиннэрээри, сайын аайы оттоспуттара. Кытай дьоҕус тыраахтарынан от мунньартан саҕалаан, ахсыс кылааһы бүтэрбит сайыннарыгар түсчүт бэрдэ буолбуттара. Таарыччы тиэхиньикэ арааһын барытын ыытар, алдьаннаҕына, өрөмүөннүүр буолбуттара.
Аны биһиги (ийэлэрин дьоно) тыаҕа уһаайба ылан, сайылык туттубуппутугар, кыра сиэн көмөлөспүтэ. Саҥа дьиэбитин иккиэн ханаппаакылаабыппыт, кырааскалаабыппыт, лаахтаабыппыт, мас сыыһын хомуйан, тэлиэскэнэн таһан умаппыппыт. Сиэним ол быыһыгар аҕатын дьонугар баран, оттоспута. Тохсус кылаас кэнниттэн, БКГЭ-ни кыайыа суоҕа диэн төрөппүттэрин дэлби хаайаммын, автотехникумҥа үөрэммитэ. Ону «кыһыл» дипломунан бүтэрэн, тута ХИФУ автодорожнай бакылтыатыгар киирэн, олус сөбүлээн үөрэнэ сылдьар. Онон, сиэннэрим кыра эрдэхтэриттэн сайын аайы тыаҕа тахсан, тиэхиньикэҕэ даҕаны сыһыннылар уонна тыа сирин үлэтин билистилэр.
Хаартыскалары Мария Сергеева хааччыйда
-
4
-
0
-
0
-
0
-
0
-
0
