Кулун тутар 16 күнүгэр ССРС спордун маастарыгар хандьыдаат, РСФСР, Саха Өрөспүүбүлүкэтин спордун маастара, «Саха Өрөспүүбүлүкэтин бастыҥ учуутала» аат туһааннааҕа, ХХ үйэ спорка лауреата, ССРС уонна РСФСР үөрэҕириитин туйгуна Иван Михайлович Жирков 85 сааһыгар, Улуу Кыайыы 80 сылын көрсө бэрт сэргэх уонна сэдэх тэрээһин ыытылынна.
Хайыһар суола тыргыллан, трибуна киэргэнэн, былаахтар ыйанан, балааккалар тардыллан, олоппос бөҕө кэчигирээн... тэрээһин субу аһыллаары тыҥаан турар кэмигэр спорт бэтэрээннэрэ анал массыыналарынан тиэллэн тиийэн кэллибит. Күрэхтэһиини тэрийээччилэр анал бэлиэ көстүүмү кэтэн, биһигини көрсөн, били бэлэмнээбит олоппосторугар олортулар. Хамаанда бэриллэн, параадтаан киирэр сиргэ мустан, бэтэрээннэр бары чөмпүйүөн лиэнтэлэрин иилинэн, кытыастар кыһыл былаах кэнниттэн турдулар. Былааҕы улууска, өрөспүүбүлүкэҕэ биллэр спортсмен Прокопий Харитоновка туттарбыттар. Бэтэрээннэр кэннилэриттэн судьуйалар, онтон түөлбэлэр сэлэлии турдулар. Параадтаан киирэн, гимнэри истэн, бүгүҥҥү бырагырааманы билсэн, эҕэрдэлэр саҕаланнылар.
Уус Алдан улууһун дьаһалтатын баһылыгын солбуйааччы Александр Алексеев, Мүрү баһылыгын солбуйааччы Вероника Сивцева, 2 №-дээх оскуола дириэктэрэ Алексей Мигалкин эҕэрдэлээтилэр уонна бэйэлэрин анал бириистэрин Прокопий Харитоновка, саамай эдэр кыттааччыга диэн туттардылар. Мүрү нэһилиэгин дьокутаата, тэрийээччи Валентина Шадрина бэтэрээннэргэ уонна Иван Жирков огдооботугар Мария Никоновнаҕа махтал суруктары, сэмэй бэлэхтэрин туттаран, биһигини соһутта даҕаны, үөртэ даҕаны.
Салгыы хайыһарынан биир эргиири сүүрүү, аҕыс киһилээх эстафета. хаалыктаах хаамыы, көрдөөх эстафета дьон болҕомтотун тарта. Төһө да сылаас күн буоллар, тымныы син биир баарын биллэрдэ. Хата, балааккаҕа киирэн итии чэй, кофе иһэн, саламаат, ис миинэ, хортуоппуйдаах соркуой сиэн, ирэн-хорон, күрэҕи көрө бардыбыт. Наһаа да түмсүүлээх, тэрээһиннээх түөлбэлэр эбит! Хаартыскаҕа түһэрэр, видеоҕа устар анал дьонноох буоланнар, ыытыллар дьаһаллары үйэтитэн иһэллэр.
Наҕараада туттарыыта бэйэтэ туспа бэлиэ түгэн буолла. Наһаа сиэдэрэй, Иван Михайлович хаартыскалаах мэтээллэри оҥорторбуттар. Дипломнара да олус тупсаҕай. Иван Михайлович оҕолоро, аймахтара туруорбут харчынан бириистэрэ: 1 миэстэҕэ – 5 тыһ солк., 2 миэстэҕэ – 3 тыһ солк., 3 миэстэҕэ – 2 тыһ. солк. харчыны сэбиэскэй кэмнээҕи кэмбиэр оҥорторбуттарыгар уган биэрдилэр.
Хамаанданан күрэххэ бастаабыттар 2 тыһ солк., иккис-үһүс миэстэлэргэ 1 тыһ солк ыллылар. Оттон биһиги, спорт бэтэрээннэрэ, анал бирииспитин аҕам саастаах кыттааччыларга анаатыбыт. Эр дьоҥҥо спорт бэтэрээнэ, өрөспүбүлүкэҕэ биллэр хайыһардьыт Варвара Новогодина диплому, 5 тыһ солк харчыны Прокопий Харитоновка, сүүрүүк уонна хайыһардьыт, куораттан анаан кэлбит Матрена Сивцева диплому уонна 5 тыһ солк харчыны Раиса Троеваҕа туттарда. Спорт бэтэрээнэ Светлана Старостина Дүпсүн орто оскуолатын 1966 с. бүтэрбиттэр ааттарынан анал бирииһи, диплому, куубагы уонна 4 тыһ солк харчыны Марина Рожинаҕа туттарда. Бу бары Иван Михайлович ииппит, эрчийбит, үөрэппит оҕолоро.
Валентина Николаевна далааһыннаах, элбэҕи толкуйдатар тэрээһини ыыппытыгар, бэйэтин тула элбэх киһи түмпүтүгэр, улуус спордун бэтэрээннэрин ыҥыран, дойдубут мүөттээх салгынынан дуоһуйа тыыннарбытыгар улахан махталбытын тиэрдэбит. Кэлин бу күрэхтэһии өссө тэнийэн, нэһилиэктэринэн, улуус да таһымынан ыытыллар буолуо, Иван Михайлович аата ааттана, үлэтин уопута хас оскуола ахсын туһаныллыа, Уус Алдан улууһа спортивнай улуус аатын төнүннэриэ диэн эрэлбитин этэбит.
Уус Алдан уулууһун бэтэрээн спортсменнарын аатыттан Анна Бурнашева
-
3
-
0
-
0
-
0
-
0
-
0
