Дьэ ол пууннарга саас ахсын сүүһүнэн тыһыынча сүөһү-сылгы таһаарыллар. Хаҥалас улууһун II Малдьаҕар нэһилиэгэр баар «Бөртө» сылгы собуота» хааччахтаммыт эппиэтинэстээх уопсастыба (салайааччы Александр Павлов) сүөһүтүн-сылгытын сайылыкка таһаарда.
Ол туһунан хаһаайыстыба биригэдьиир Ульяна Семенова маннык кэпсээтэ:
– Өрүс эҥэрдээх буоламмыт, сүөһүбүтүн-сылгыбытын сайылыкка эрдэ таһаарар үгэстээхпит. Ол курдук, өссө муус устар ый бүтүүтүгэр өрүс арыытыгар кыстаппыт калмык боруода ынахтарбытын Сахсаа учаастагар таһаарбыппыт, онтон 387 субаны Араҕас Атыыр сайылыгар көһөрбүппүт. Ыанар ынахтары урут ыам ыйын 10 күнүттэн көһөрөр этибит, оттон дьылбыт эрдэлээн, быйыл эрдэ көһөрдүбүт: Уу Көхсүгэр 133, Куоһаҕаска 133 уонна Мондурахха 125, холбоон 391 ынаҕы үс сайылыгынан бэҕэһээ таһаардыбыт.
Билиҥҥи туругунан, 281 ынахпыт төрөөн, сыл саҕаланыаҕыттан 217 туонна үүтү ыатыбыт, былырыын баччаларга 207 туоннаны ыабыппыт. Ааспыт муус ыйыгар 83 туоннаны ыатыбыт. Үүт ыамын түһэрбэт туһугар, мэччирэҥ тахсыар диэри, бостууктар ынахтары далга хаайан аһаталлар. Сайылыкка астыыр сыахтаахпыт, онон үүппүт тута астанар.
Хаартыскалары Ульяна Семенова ыытта
-
0
-
0
-
0
-
0
-
0
-
0
