Көрсүһүүгэ тыа хаһаайыстыбатын эйгэтин ситиһиилэрин уонна тирээн турар боппуруостар тула сэһэргэһии барда. Александр Атласов АПК үлэһиттэрин өйөөһүн улахан суолталааҕын чорботон бэлиэтээтэ, Саха Өрөспүүбүлүкэтигэр бу хайысханан туох ыытылларын, ол иһигэр, анал орто уонна үрдүк үөрэхтээх эдэр исписэлиистэри олохсутан үлэлэтиигэ туһуланар сокуон баарын, улуустарга 14 хайысханан субвенсия көрүллэрин туһунан кэпсээтэ. Национальнай бырайыактарынан уонна «Тыа сирин кэлимник сайыннарыы» бырагырааманан ыытыллар үлэни сырдатта. Ордук болҕомтону тыа хаһаайыстыбатын үлэтин-хамнаһын сүрүннээһин, салайыы тиһигэр уурда.
Вологда уобалаһын бэрэстэбиитэлэ кэтэх ыаллар ыанар ынахтарын ахсын харчы көрүллэрин туһунан истэн бэркэ сэргээтэ, кини эрэгийиэнигэр кэтэх ыаллар сүөһүнү ииппэт буолан эрэр эбиттэр, онон балаһыанньаны көннөрөргө өйөбүл ырычааҕын тобулар ирдэммит. Приморье кыраайын бэрэстэбиитэлэ Мелиорация федеральнай сулууспатын кытары үлэлиир уустугун, мелиоратордар төһө хамнаһы ылаллара биллибэтин туһунан эттэ. Приморьеҕа тыа хаһаайыстыбатынан дьарыктанаары тас дойдулартан старовердар маассабайдык көһөн кэлэллэр, онон кэлэр өттүгэр сир боппуруоһугар мөккүөр үөскүөн сөп эбит.
Көрсүһүү кыттыылаахтара АПК үлэһиттэрин идэлээх сойууһун улуустардаҕы салааларын түмэргэ эттилэр. Идэлээх сойуус чилиэннэрин усунуостарын хомуйууну тэрийиигэ санаа атастастылар.
Бу көрсүһүү Арассыыйа аграрнай сиэктэрин сайыннарыы тирээн турар боппуруостарын көмөлөөн быһаарарга эрэгийиэннэр бэрэстэбиитэллэрэ бары интэриэстээхтэрин көрдөрдө диэн Ил Түмэн пресс-сулууспата иһитиннэрэр.
Хаартыскаҕа Василий Кононов (Ил Түмэн) түһэриитэ.
-
0
-
0
-
0
-
0
-
0
-
0
