Бастакы күҥҥэ Тыа хаһаайыстыбатын уонна ас-үөл бэлиитикэтин министиэристибэтигэр, «Сахаагроплем» СБТ-гэр, сылгыны иитэр бөдөҥ хаһаайыстыбаҕа сылдьан, күннээҕи үлэни-хамнаһы, өйөбүл ырычааҕын, бородууксуайны оҥоруу туругун, инники былааннары билистэ.
Олунньу 27 күнүгэр Уһук Хотугу сиргэ тыа хаһаайыстыбатын сайыннарыы боппуруостарыгар анаммыт төгүрүк остуолга кытынна. Кэпсэтиини саҕалыырыгар Федерация Сэбиэтин тыа хаһаайыстыбатын уонна аһылык бэлиитикэтигэр, айылҕаны туһаныыга кэмитиэтин бэрэссэдээтэлин солбуйааччы Егор Борисов болҕомтону хотугу омуктар төрүт хаһаайыстыбаннай дьарыктарыгар итиэннэ судаарыстыбаннай өйөбүш саҥа ырычаахтарыгар туһаайда.
Арассыыйа Федерациятын тыатын хаһаайыстыбатын миниистирин солбуйааччы Роман Некрасов өрөспүүбүлүкэ АПК-тын экэниэмикэтин туругун анаалыстаата. Өйөбүл баар буолуоҕа, ол эрээри, билигин тыа хаһаайыстыбата дохуоттаахтык үлэлээн, аһынан-үөлүнэ хааччыныы таһымын үрдэтиэхтээх. Сүрүн сорук субсидияҕа эрэ найыламмакка, кирэдьиити ылар уонна үбү-харчыны сайдыыга угар туһугар, хаһаайыстыбалар көдьүүстээхтик үлэлииллэрин ситиһии буолар диэтэ. Саха Сирэ сылгыны үөрдээн иитии бэйэҕэ турар сыанатыгар дойдуга бастаан иһэрин бэлиэтээтэ.
– Ыаллыы эрэгийиэннэргэ тэҥнээтэххэ, бэйэҕэ турар сыана эһиэхэ быдан намыһах, ити бу хайысхаҕа эһиэхэ күрэстэһээччи элбэҕин көрдөрөр. Оҥорон таһаарыы көрдөрүүтэ төһө да үрдүк буоллар, барыта барыһы мэктиэлиир буолбатах эбит. Субсидията суох балаһыанньа уустугурар: таба салаатыгар бүддьүөттэн угуллубут 1 солк. харчыга ночоот 55 харчы эбит, ити толкуйдууру эрэйэр. Көтөргө көрдөрүү куһаҕана суох, сымыыты уонна көтөр этин оҥоруу экэнэиэмикэтэ тэҥнэһэр, саҥа технологиянан сэбилэнии көдьүүһүн көрдөрбүт. Билигин билимтэн олоххо туһаныллар кыахтаах, ночооту намтатар, үлэ оҥорумтуотун үрдэтэр этиилэри күүтэбит, – диэтэ.
Дойду үрдүнэн ыытыллар производствоны улаатыннарар тосхол ыстатыыстыкатын билиһиннэрдэ. Ол курдук, 400-тэн итэҕэһэ суох сүөһүлээх пиэрмэлэргэ судаарыстыбаттан өйөбүлэ суох көдьүүс 20 %-ҥа (үүт ыама 5,6 туонна), 1000 ынахтаах комплекстарга 40 %-ҥа (үүт ыама 10 туонна) тиийэр эбит. Аартыкаҕа итинник аһары бөдөҥ пиэрмэлэри тутар кыалллыбатын быһыытынан, сөптөөх үлэлиир усулуобуйаны тэрийэргэ кэпэрээссийэ саҥа киэптэрин тутуһар тоҕоостооҕун ыйда.
Сиртэн үүнээйини ылыы туруга өрөспүүбүлүкэҕэ бигэтин, судаарыстыбаттан өйөбүлэ суох хортуоппуйга үлэ көдьүүһэ 2 %-ҥа, оҕуруот аһыгар 22 %-ҥа тэҥнэһэрэ Уһук Илиҥҥи федеральнай уокурукка бастыҥ буоларын бэлиэтээтэ. «Саюри» тэпилииссэ комплексын үлэтин үрдүктүк сыаналаата, нэһилиэнньэни олохтоох аһынан хааччыйыыга үчүгэй холобур буолар диэтэ.
Өйөбүл саҥа мэхэньиисимин билиһиннэрэригэр, сүрүн ыстаапканы 70 % сабар кирэдииттээһин ырычааҕа уларыйыа суоҕа, болҕомто саҥа инвестбырайыактарга, ол иһигэр, бройлернай баабырыкалары тутууга, ууруллуоҕа. Хапытаалынай тутууну өйөөһүн судаарыстыбаннай бырагыраама 17-с сыһыарыытын чэрчитинэн оҥоһуллуо, тыа хаһаайыстыбатын табаарын оҥорооччулар тэрили ылалларыгар тутар-таҥар үлэни ыыталлара буолбакка, сүөһүлэрин ахсаана ирдэниэҕэ.
Дьоҕус хаһаайыстыбалар умнуллуохтара суоҕа. Билигин оҥоһулла сылдьар комбинированнай бырагырааманан пиэрмэрдэр ылбыт граннарын «Россельхозбаан» чэпчэтиилээх кирэдиитигэр солуок быһыытынан туһанар кыахтаныахтара диэтэ. Бу туһунан Тыа хаһаайыстыбатын уонна ас-үөл бэлиитикэтин пресс-киинэ суруйар.
Хаартыска: тустаах саайтан.
-
0
-
0
-
0
-
0
-
0
-
0
