Уопсастыба

«Мин дьыссааппын ахтабын,  барар кэммин күүтэбин. Ийэм эрдэ туруораар, эрдэ илдьэн туттараар», -- бу ырыа тылларын кыһыл көмүскэ тэҥнэнэр  кырачаан сааспытыгар  уһуйааҥҥа иитиллибит араас көлүөнэ дьон бары билэбит, истиҥник саныыбыт.

Таатта улууһун Харбалааҕар Христина Сергеевна Кривошапкина сэбиэдиссэйдээх «Кэскил» уһуйаан улууска уонна өрөспүүбүлүкэҕэ биир бастыҥ үлэлээҕинэн биллэр. Иитээччилэр сыл аайы идэлэрин таһымын үрдэтэр араас сэминээрдэргэ, куурустарга сылдьаллар. Ол курдук, ааспыт үөрэх сылыгар «Кэскил» уһуйаан «ҮнүгэсЧээн» дьоҕус агрокомплекс бырайыага инновационнай бырайыактар күрэхтэригэр Ил Дархан Гранын ылбыта. XХ өрөспүүбүлүкэтээҕи «Сельская школа & Образовательная марка» диэн иитэр-үөрэтэр үлэ дьаарбаҥкатыгар «Кыһыл көмүс дебют» номинация муҥутуур кыайыылааҕа буолбута. «Өрөспүүбүлүкэтээҕи инновационнай былаһаакка» ыстаатыһыгар мэктиэлэммитэ.

Бу бырайыагынан оҕолор тыа хаһаайыстыбатыгар түргэнник ситэр салаатын кытары билсэллэр, чинчийэллэр, кэтээн көрөллөр, инкубаторга чоппууска, чиэрбэ иитэллэр, арассаада тылыннараллар, туойунан дьарыктаналлар.

Бу курдук кыра саастарыттан чинчийэр үлэҕэ сысталлар. Сайын кэлбитинэн, Оҕо көмүскэлин күнүн көрсө, бэҕэһээ уһуйаан Ыһыаҕа ыһылынна. Муусука тыаһа, оҕолор көхтөөх саҥалара сарсыардаттан дьиэрэйдэ. Оҕолор төрөппүттэринээн сахалыы таҥнын кэлэн, бары үөрэ-көтө сылдьаллара сүргэни көтөҕөр.

Ыһыах буоларын курдук арчылааһынтан, алгыстан саҕаланна. Алгыһы толордо Хантайар Туллук Охоноон кыыһа. Сүрдээх эйэҕэс, намыын куолаһынан барыта этэҥҥэ буоларыгар түстээтэ. Бөлөҕүнэн сэлэлии хаамтылар, бэлэмнэнии бөлөх иитиллээччитэ Снежана Андреева чуор куолаһынан оһуокайы таһаарда. Дьоллоох оҕо саас ырыата, үҥкүүтэ, сахалыы үнүстүрүмүөҥҥэ оонньооннор төрөппүттэрин астыннардылар.

Ыһыахха буоларын курдук кыргыттарга «Уһун суһуох», уолаттарга «Бэргэн Боотур», сүүрүүлээх-көтүүлээх оонньуулар ыытылыннылар. Күрэхтэргэ оҕолор үөрэ-көтө, ким да туора турбакка кытыннылар, бириис ыланнар үөрдүлэр-көттүлэр.

Түһүлгэни киэргэтиигэ 1-кы миэстэни «Чаҕылыс» орто бөлөх, 2-с миэстэни «Ымыычаан» кыра бөлөх, 3-с миэстэни «Кэнчээри» бэлэмнэнии бөлөх ыланнар, сыаналаах бириистэринэн наҕараадаланнылар. Түһүлгэлэр өбүгэлэрбит олорон ааспыт олохторун, туттубут малларын-салларын көрдөрөр тус-туспа тиэмэлэрдээх. Оҕолорбут маны көрө-истэ сылдьан элбэҕи билэллэр.

Дьиэ кэргэнинэн «Family look» күрэххэ уонтан тахса ыал кыттыыны ылла. Манна уратыта диэн дьиэ кэргэн таҥаһа биир өҥнөөх буолуохтаах. 1-кы миэстэни Ксенофонтовтар, 2-с миэстэни Баишевтар, Борисовтар, 3-с миэстэни Бродниковтар, Тумановтар ыллылар. Оҕолор төрөппүттэрин кытары түһүлгэҕэ сэлэччи олорон арыылаах саламаат, алаадьы, быырпах, сахалыы ас-үөл арааһын аһаан, үөрэн-көтөн тарҕастылар.  Оҕолорбут улууска, өрөспүүбүлүкэҕэ ыытыллар араас күрэхтэргэ миэстэлэһэллэр. Элбэҕи үөрэтэр-иитэр, истиҥ сыһыаннаах иитээччилэрбитигэр махтанабыт. Оҕолорбут өссө сайдалларыгар, билиҥҥи ирдэбилгэ эппиэттиир уһуйаан дьиэтэ тутуллара буоллар диэн эрэнэ кэтэһэбит, нэһилиэк олохтоохторо бары туруорсабыт.