Уопсастыба

Оҕо бары өттүнэн сайдар эйгэтэ аныгы ирдэбиллэргэ эппиэттиир буолуохтаах, ону ситиһээри Дьокуускайдааҕы Е.Г. Корнилова аатынан 51 №-дээх «Кэскил» оҕо уһуйаана Олохтоох көҕүлээһиннэри өйүүр бырагыраама (ППМИ-2026) куонкуруһугар «Алгыстаах алаһа» диэн оҕо оонньуур былаһааккатын бырайыагынан кыттар.
Биһиги хас биирдии иитиллээччибит сибиэһэй салгыҥҥа көҥүллүк оонньоон, тулалыыр эйгэтин чинчийэн, успуордунан дьарыктанан, сөптөөхтүк хамсанан бары өттүнэн сайдан тахсарын ситиһэр соруктаахпыт. Маныаха, оҕо олоҕор уонна доруобуйатыгар куттала суох, тупсаҕай тутуулаах оонньуур былаһаакканы тэрийэргэ кыһаллабыт. Онон «Алгыстаах алаһа» бырайыак «Кэскил» оҕо уһуйаанын тэлгэһэтигэр баар оонньуур былаһаакка хонуутун иккис аҥарын оҥоһуу от (имитация газона) бүрүөһүнүнэн бүрүйэргэ туһаайыллар.
Санатан эттэххэ, быйыл сайын уһуйаан кэллэктиибэ, төрөппүттэрэ, Дьокуускай куорат Сайсары уокуругун олохтоохторо бары сомоҕолоһон оонньуур былаһааккабыт бастакы аҥарын өрөмүөннүүрү ситиспиппит. Ол курдук, былаһааккаҕа эргэ оонньуур оборудованиены уларытыы, хонууну тэҥнээн саҥа, куттала суох бүрүөһүнү тэлгэтии үлэтэ ыытыллыбыта. Аны былаһааккабыт барыта биир тэҥ буоларын ситиһэн иккис аҥарын саҥардар кэм кэллэ.
Оонньуур былаһаакканы барытын саҥардан биһиги тугу ситиһэбит?
Бастатан туран, оонньуур сир оҕолор олохторугар, доруобуйаларыгар куттал суох буолуутун хааччыйабыт. Эргэрбит хонуулаах, оборудованиелаах былаһаакка эчэйиигэ тиэрдиэн сөп, онтон саҥа бүрүөһүн оҕолор көхтөөхтүк оонньуур кэмнэригэр эрэллээх көмүскэли үөскэтиэ.
Иккиһинэн, оонньуу табыгастаах буолар. Ол курдук, оҕолор хааччаҕа суох оонньууга толору ылларан көҥүллүк оонньуохтара, сүүрүөхтэрэ-көтүөхтэрэ, ойуоккалыахтара, мэниктиэхтэрэ.
Үсүһүнэн, киһини умсугутар, чаҕылхай көрүҥнээх эйгэ үөскүүр. Оҥоһуу от бүрүөһүннээх былаһаакка тупсаҕай көрүҥнэнэн оҕолор дуоһуйа сынньаныахтара, иллэҥ кэмнэрин туһалаахтык атаарыахтара.
Төрдүһүнэн, саҥардыллыбыт былаһаакка халбаҥнаабат уһун үйэлэнэр. Тоҕо диэтэххэ, аныгы матырыйааллар хонуу бүрүөһүнэ эрэллээх буолуутун, күн-дьыл уларыйыытын тулуйарын мэтиэлииллэр.
Бэсиһинэн, саҥардыллыбыт былаһаакка эт-сиин көҕүн үрдэтэр, о.э. куттала суох, тупсаҕай эйгэ оҕолор хамсаналларыгар табыгастаах буолар. Мантан сиэттэрэн, оҕо кыра эрдэҕиттэх сөптөөхтүк хамсанан чөл туруктаах, кытаанах доруобуйалаах буола улаатар.
Алтыһынан, оонньуур кэмҥэ оҕолор бодоруһа үөрэнэллэр. Онон, саҥардыллыбыт былаһаакка бииргэ оонньуурга, астына алтыһарга уонна доҕордуу сыһыан үөскүүрүгэр тоҕоостоох сиринэн буолуоҕа.
Олохтоох көҕүлээһиннэри өйүүр бырагыраамаҕа кыттаммыт биһиги олорор сирбит инфраструктурата сайдарыгар сэмэй кылааппытын киллэрэбит, үүнэр көлүөнэ туһугар кыһамньыбытын көрдөрөбүт. Бырайыак олоххо киирэригэр барыта 2 мөлүйүөн солкуобай үп көрүллүөн наада. Маныаха, куонкуруска ситиһиибит хас биирдиибититтэн тутулуктаах. Баҕа санаа уонна итэҕэл баар буоллаҕына, тугу баҕарар ситиһиэххэ сөп. 
Куонкуруска кыттыыга бэлэмнэнии үлэтэ номнуо ыытылла турар. Ол курдук, уопсай мунньахтарга талыллыбыт, уһуйаан кэллэктиибин, төрөппүттэр бэрэстэбиитэллэриттэн, Сайсары уокуругун олохтоохторуттан турар Көҕүлүүр бөлөх үлэтин саҕалаабыта. Бырайыагы олоххо киллэрэргэ туһаайыллыбыт кэккэ тэрээһиннэр былааннаахтык ыытыллаллар.
«Алгыстаах алаһа» бырайыак олоххо киириитэ оҕолорбут дуоһуйа оонньуулларыгар, сайдалларыгар табыгастаах эйгэни тэрийиигэ дьоһуннаах хардыы буолуоҕар эрэнэбит. Бары бииргэ оҕолорбутугар куттала суох, тупсаҕай уонна умсугутуулаах оонньуур былаһаакканы бэлэхтииргэ дьулуһуоххайыҥ!

Дьокуускайдааҕы 51№ «Кэскил» оҕо уһуйаанын администрацията