Общество

Элбэх оҕолоох ыалларга социальнай өйөбүл дьаһалларын тупсарыы Уһук Илин демографическай бэлиитикэтин чорботор соруга буолар. Маныаха туох  өйөбүл дьаһаллара баалларын туһунан хаһыакка мэлдьи суруйабыт. Холобурдаан эттэххэ, Саха Өрөспүүбүлүкэтигэр элбэх оҕолоох ыаллар ОДьКХ өҥөлөрүн төлөбүрүгэр 30 %-тан намыһаҕа суох кээмэйдээх чэпчэтиинэн туһаналлар, оскуолаҕа оҕолор босхо аһыыллар, куорат уонна куорат таһынааҕы тырааныспарынан босхо айанныыллар. Элбэх оҕолоох ыал оскуоланы бүтэрбит оҕото төлөбүрдээх орто анал үөрэххэ киирдэҕинэ, 50 тыһ. солк. кээмэйдээх биирдэ көрүллэр харчынан көмө оҥоһуллар.

Оҕо көмүскэлин күнүгэр өрөспүүбүлүкэ үрдүнэн кырачааннарга анаан араас көрдөөх оонньуулар, кэнсиэртэр, куонкурустар ыытыллыахтара. Киин куоракка фонтаннар үлэлээн саҕалыахтара. Ол туһунан ыам ыйын 13 күнүгэр «Прямой разговор» биэриигэ Ил Дархан  Айсен Николаев көрөөччү ыйытыытыгар хоруйдаан туран эттэ. Өрөспүүбүлүкэ сүрүн болуоссатыгар саҥа, ыллыыр фонтан 2024 с. аһыллыбыта. Бу болуоссаты саҥардыы Бэрэсидьиэн  Владимир Путинынан бигэргэммит куорат маастар-былаанын чэрчитинэн бастакы эбийиэк буолар.

Култуура уонна сынньалаҥ пааркатыгар Судаарыстыбаннай циркэ «Тооку»  оҕо ханаалын кытары бырааһынньыктааҕы бырагырааманы бэлэмнииллэр. Леди Баг, Супер куоска хула-хуптуохтара, жонглердуохтара. К-РОР истиилинэн каучук гимнастар, «Трезубец»  нүөмэринэн Кытай императора аралдьытыахтара, «Аладдин» остуоруйа султана уонна дьоруойдара фокустарынан соһутуохтара. Көрдөөх Шляпник, клоуннар, «Арктик Цирк» оҕо устуудьуйатын иитиллээччилэрэ оонньоон көрдөрүөхтэрэ, араас куонкурустар, флешмоб буолуо.

Эстрада судаарыстыбаннай тыйаатырыгар сыанаҕа «Эрэл тыала» инклюзивнай айар лабораторияны бүтэрбиттэр тахсыахтара. Кинилэри кытары кэнсиэркэ Наталья Викторовна, Александр Максимов, «Айархаан» кэлэктиип, Василий Новоприезжай, Варвара Аманатова, Герман уонна Клавдия Хатылаевтар кыттыахтара. Оҕолору өйүү таарыйа тыйаатырга сылдьан сынньаныҥ! Киирии билиэт сыаната – 300 солк.

Улуустарга эмиэ араас дьаһаллар тэриллиэхтэрэ. Оттон Өлүөхүмэҕэ Оҕо көмүскэлин күнүн бэлиэтээһини күн-дьыл туругунан, төрөппүттэр этиилэрин учуоттаан,   бэс ыйын 7 күнүгэр көһөрбүттэр. Бырааһынньыктааҕы бырагырааманан Ленин болуоссатыгар эбии үөрэхтээһин тэрилтэлэрэ уонна оҕо бибилэтиэкэтэ аралдьытар былаһааккалары тэрийиэхтэрэ. Кэлээскэлэр параадтара баар буолуо. Баһаарынай сулууспа уунан фейерверк оҥорорго былаанныыр. Баҕалаахтар  «Хорсун холбуйа» аахсыйаҕа кыттыахтара.

Хас биирдии алаһа дьиэ оҕо дьоллоох күлүүтүнэн-үөрүүтүнэн толору буоллун! Оҕолорбут дьоллоох, чэгиэн-чэбдик дьон буола улааттыннар диэн туран, Оҕо көмүскэлин  күнүн көрсө Ил Түмэн дьокутаата, «Биир ньыгыл Арассыыйа» баартыйа «Бөҕө дьиэ кэргэн» бырайыагын сүрүннээччи Афанасий Постников маннык этэр:

– Элбэх оҕолоох ыаллары өйөөһүн судаарыстыба туруктаах сайдыытын акылаата буолар. Маннык көҕүлээһиннэр нэһилиэнньэ ахсаана эбиллэригэр тирэх буолаллар, судаарыстыба дьиэ кэргэҥҥэ кыһамньытын кэрэһилииллэр. Үтүө түмүктэр номнуо көстөн эрэллэр: оҕо төрөөһүнүн коэффициенэ үрдээн, бырагырааманы биһирээччи элбээн иһэр.

Хаартыска: "Парус" уһуйаан архыыбыттан.