Уопсастыба

Бэс ыйын 16 күнүгэр Ытык Күөлгэ ОДьХХ уонна энэргиэтикэ миниистирэ Вячеслав Емельянов, бу министиэристибэ сүрүн инженерэ Владимир Бондарь, «Якутскгеология» тэрилтэ салайааччыта Владимир Архипов, «Экосистема Якутии» ХЭТ салайааччыта Валерий Чукоров, «Роспотребнадзор» салаатын исписэлииһэ Наталья Борисова Ытык Күөл бөһүөлэгин скважиналарын үлэтин билистилэр уонна улуус баһылыга Айаал Бурцевтыын мунньахтаатылар.

Айаал Бурцев, кини бастакы солбуйааччыта Руслан Захаров, Таатта улууһун борокуруорун э.т. Дмитрий Васильев Чөркөөххө тутулла турар модульнай тииптээх успуорт саалатын тутуутун хаамыытын билистилэр. Үлэ кыраапык быһыытыан ыыталлар. Саала атырдьах ыйыгар үлэҕэ киириэхтээх.

«Тааттавтодор» тэрилтэ айан суолугар 2 км. 400 м усталаах суол учаастагын өрөмүөннүүр.

Саһыл Уйалаах ипподромугар Амма, Чурапчы, Үөһэ Бүлүү, Нам улуустарын тириэнэрдэрэ, ат баайааччылара «Тааттаавтодор» генеральнай дириэктэрэ Иван Бочонины кытта сүбэ мунньахтаатылар. Мунньахха ат сүүрдүүтүн өрөспүүбүлүкэтээҕи федерациятын толорооччу дириэктэрэ Татьяна Капылова, федерация бэрэстэбиитэлэ Эдуард Рехлясов кытыннылар. Оонньууларга биэс дистанцияҕа (1600 м., 2400 м. кэлии ыраас хааннаах, 1600 м., 2400 м. ыраас хааннаах Саха сиригэр төрөөбүт, 7000 м. саха атын сүүрдүү) барыта 60 ат сүүрэрэ күүтүллэр.

Оробуочай сырыы түмүгүнэн, саала тутуута тэтимирдэргэ, ипподромҥа эбии үлэни ыытарга быһаарылынна.

Бэс ыйын 18 күнүгэр, СӨ успуорка уонна физическэй култуураҕа миниистирэ Леонид Спиридонов, норуот дьокутаата Геннадий Васильев салалтатынан Манчаары Баһылай аатынан өрөспүүбүлүкэтээҕи успуорт национальнай көрүҥнэрин киинин үлэһиттэрэ Ытык Күөлгэ үлэлээтилэр. Улуус баһылыгын салайыытынан ипподрому, Алексей Турнин аатынан МФОКСу, стадиону көрдүлэр, түмүктүүр үлэлэри билистилэр.

Үлэҕэ өрөспүүбүлүкэ иһитиннэрэр-биллэрэр эйгэтин суруналыыстара кыттыстылар. Уонтан тахса күн араастаһар кэмҥэ үлэ сөптөөхтүк баран иһэрин, стадион уонна МФОКС үлэтэ түмүктэнэрэ чугаһаабытын бэлиэтээтилэр.

МФОКС территориятын күрүөлүүр, киирии сири оҥоруу, көҕөрдүү үлэтэ ыытыллаллар. Көҕөрдүүгэ Таатта, Чурапчы бэтэрээн сүүрүктэрэ түөрт уонча хатыҥы, талаҕы олортулар. Бэтэрээн ыспарсымыаннарга Чурапчы улууһун Хатылы, Болтоҥо оскуолаларын профсойуустарын бэрэссэдээтэллэрэ бааллар.

Күн иккис аҥарыгар улуус дьаһалтатын саалатыгар үлэ сүнньүнэн сүбэ мунньах ыытылынна.

Таатта олохтоохторо улуус киинин ырааһырдыыга уонна тупсарыыга көхтөөхтүк үлэлииллэр. Маныаха, Таатта түмсүү уопсастыбанньыктара ыытар тэрээһиннэриттэн туора турбаттар, бэйэлэрин баҕа өттүлэринэн субуотунньуктарга, араас хабааннаах үлэҕэ көхтөөхтүк кытталлар. Ол курдук, түмсүү чилиэннэрэ бэтэрээннэр олорор дьиэлэрин уонна эргэ балыыһа күрүөлэрин кырааскылаатылар. Маннык түмсүүлээх үлэ Тааттаҕа күүтүүлээх Манчаары оонньууларын үрдүк таһымҥа ыытарга уонна улууһу тупсарарга улахан көмө буолар.

Иһитиннэрии: Манчаары оонньууларын пресс киинэ.

Хаартыска: https://t.me/mrtatta