Уопсастыба

Тэрээһин куорат 2 №-дээх Ускуустуба оскуолатын иитиллээччилэрин уонна преподавателлэрин “Забавушка” ансаамбылын домбраҕа толоруутун (сал. СӨ култууратын туйгуна Е.С.Попова, хормейстер СӨ култууратын туйгуна Т.Н.Шилова), Хаҥалас музыкальнай оскуолатын “Ай-ыллаа” дьахталлар ансаамбылларын толоруутугар “Моя Якутия” (сал. СӨ үтүөлээх үлэһитэ М.С.Семенова), Опера уонна Балет тыйаатырын артыыһа Дина Охлопкова музыкальнай нүөмэрдэринэн саҕаланна. Сэргэх, классическай кэнсиэр кэнниттэн “Манчаары Оонньууларын” кэмигэр уһуллубут видеолары көрдүбүт.
“Таатта түмсүү” ыытыллар дьаһалларга барытыгар актыыбынайдык кыттар, онон төрөөбүт дойдубутугар көмө, өйөбүл буоларга түмсүү хас биирдии киһитэ баҕарар. “Манчаары Оонньууларын” тэрээһинигэр кыттарга, үбүнэн көмөлөһөргө улуус баһылыгын бастакы солбуйааччы Руслан Захаров маҥнайгы мунньаҕы ыытан, ыҥырбытыгар бары өйүүргэ туруммуттара. Мунньахха Андрей Данилов тыл этэригэр, бу Оонньуулары өйөөн үп хомуйуутугар штаб тэрийэрин, уонна үлэһиттэрин үбүлүүрүн эппитэ. Онон, түөрт киһилээх штаб Бэчээт дьиэтигэр тэриллэн, биирдиилээн дьонтон, нэһилиэктэр түмсүүлэриттэн үп хомуллан, уонна биллэн туран, биллэр улахан чааһынай тэрилтэлэрбит, урбаанньыттарбыт өйөөннөр, 13 мөлүйүөн солкуобай кэриҥэ харчы хомуллан пуондаҕа киирбитэ. Дьэ, бу буолар төрөөбүт дойдуга таптал!
Улуус баһылыга Айаал Бурцев тыл этэригэр куоракка олорор биир дойдулаахтарыгар улаханнык махтанна. Кырдьык, куоракка да олордорбут, бары турунан төрөөбүт дойдубутун өрө тардар кыахтаахпытын өссө төгүл биллибит. Баһылыкпыт Анал байыаннай дьайыыга барбытын кэннэ, түмсүүнү кытта баһылыгы солбуйааччы Руслан Захаров ыкса үлэлэспитин бэлиэтиир оруннаах.

Баһылык Айаал Бурцев бүтүн өрөспүүбүлүкэ дьоно-сэргэтэ ыалдьыттаабыт, саха күүстээх спортсменнарын күрэс төрүт көрүҥнэригэр түмпүт “Манчаары Оонньууларыгар” улахан үбүнэн көмөлөспүт үтүө дьоннорбутугар улуус бэлиэлэринэн наҕараадалаата. Ол курдук, “Таатта улууһун бочуоттаах олохтооҕо” бэлиэни Александр Ханиҥҥа, “Монтажник” производственнай кооператив салайааччытын солбуйааччытыгар, “Таатта улууһугар кылааттарын иһин” бэлиэни Юрий Большаковка, “Учур” тэрилтэ салайааччытыгар, Владимир Аржаковка, Дьокуускай куоракка “Таатта” түмсүү салайаччытыгар, Андрей Даниловка, “Сэттэ” тутар хампаанньа салайааччытыгар, Спартак Петровка, чааһынай урбаанньыт, Сергей Варламовка, “Строймост” тэрилтэ салайааччытыгар, Афанасий Андреевка, “Боотур” чааһынай охраннай тэрилтэ салайааччытыгар ытыс дохсун тыаһынан туттарда. Маны таһынан, баһылык Афанасий Андреевка успуорт уонна физическэй култуура миниистирэ Леонид Спиридоновтан «СӨ спордун бэтэрээнэ” ааты иҥэрэр дастабырыанньаны туттарда.

Улуус баһылыгын Махтал суруктарынан Николай Акимов, “Скам групп” тэрилтэ генеральнай дириэктэрэр, Айаар Акимов, чааһынай урбаанньыт, Юрий Дарбасов, чааһынай урбаанньыт, Айаал Макаров, “Мясной Двор” төрүттээччитэ, Том Макаров, “Мясной двор” салайааччыта, Сергей Софронов, “Сириус” тэрилтэ салайааччыта, Андрей Попов, “Профстандарт” тутуу тэрилтэтин салайааччыта уо.д.а. бэлиэтэннилэр.

Эҕэрдэ тылы “Таатта” түмсүү салайааччыта Владимир Аржаков ылар. Кини түмсүү иһинэн тэриллибит штаб үлэһиттэригэр махтал суруктары туттарда. Бэйэтин уонна түмсүү аатыттан улахан уопсастыбаннай тэрилтэбит араас полиграфическай үлэлэрин уонна “Манчаары Оонньууларыгар” оҥорон таһаарбыт өйдөбүнньүк бородууксуйатын (значок, веер, “Манчаары Оонньууларын” үс талисманын Кэрэ Кытыл, Тоттооной, Талах Бэргэн нобуорын ) иһин Юрий Дарбасовка, Көҥүл тустууга Арассыыйа успуордун маастара, СӨ хапсаҕайга маастара, боевой самбо Бүтүн Арассыыйатааҕы турнирын призера, норуоттар икки ардыларынааҕы панкратион турнирдарын кыайыылаахтара, Таатта сиригэр, Дьулуруйар Ньургун Боотур стадионугар XXII “Манчаары Оонньууларын” уотун умаппыт Игнатий Андросовка, СӨ биир күүстээх спортсмена, таатталар киэн туттар уолбут, “Олоҥхо Оонньууларыгар” куруук кыттар Николай Матаннановка, түмсүү сүрүн боппуруостарын быһаарсар, биир тутаах киһибит Сергей Софроновка, Хаҥалас улууһун бочуоттаах гражданина, СӨ үтүөлээх тутааччытыгар Андрей Даниловка туттарда.

Салгыы өйдөбүнньүк хаартыскаҕа түһүү кэнниттэн, минньигэс астаах фуршет ( ИП Львова С.И. «Кулар Кейтеринг”) бэртээхэй эйгэни үөскэтэн, биир дойдулаахтар истиҥ кэпсэтиилэрин, көрсүһүүлэрин тэрийдэ.
Бу курдук, Дьокуускай куоракка олорор Таатта дьоно төрөөбүт дойдуларын салалтатын, биир дойдулаахтарын ааттарыттан тэриллибит дьоро киэһэҕэ дуоһуйа сырыттылар.

Лариса Аввакумова, Арассыыйа Суруналыыстарын сойууһун чилиэнэ