Роман Романов 1974 сыллаахха Баайаҕаҕа күн сирин көрбүтэ. Оҕо эрдэҕиттэн успуорт бары көрүҥэр дэгиттэр кыахтаах этэ, ол гынан баран өйө-санаата, сүрэҕэ-быара өбүгэ оонньууларыгар, чуолаан мас тардыһыытыгар сытара. Роман ыспарсымыан быһыытынан ситэн-хотон, сатабыла, кыаҕа алмаас таастыы күлүмүрдээн, кыһыл көмүстүү чаҕылыйан мас тардыһыытын күрэхтэһиилэригэр үгүстэ ситиһиилэммитэ. Ол курдук, XV-с, XVI-с Манчаары оонньууларыгар субуруччу кыайыы өрөгөйүн үөрүүтүн билбитэ, бар дьонун үөрдүбүтэ, астыннарбыта.
Роман Романович төрөөбүт нэһилиэгэр Аҕа баһылыгынан 20 сыл устата үлэлээбитэ. СӨ муниципальнай сулууспатын туйгуна, «СӨ олохтоох бэйэни салайыныы сайдыытыгар кылаатын иһин», И.И. Крафт аатынан СӨ Бэрэсидьиэнин «Попечитель уонна меценат» бэлиэлэр хаһаайыннара баһылыктыыр кэмигэр дьонун-сэргэтин биир сомоҕо санаалаан, тапталлаах Баайаҕатын инники сайдыытын киэҥник көрөн утумнаах үлэни ыыппыта. Бары таһымҥа дьаныардаахтык туруулаһан, туруоруммут сыалын ситиһэн, Баайаҕа нэһилиэгин социальнай-экэнэмиичэскэй, култуурунай-духуобунай сайдыытын түстээбитэ, дириҥ, баай устуоруйалаах тапталлаах дойдута Саха Сирин биир бэлиэ сиринэн буоларыгар олук уурбута. 2023 сыллаахха соһуччу күн сириттэн күрэммитэ.
Баайаҕалар чулуу уолларын, тумус туттар киһилэрин, холобур оҥостор салайааччыларын кэриэстээн, тапталлаах Таатталарыгар буолар Манчаары оонньууларыгар сомоҕолоһон бириис туруорбуттара хайҕаллаах суол.
Санатан эттэххэ, от ыйын 9 күнүгэр Ытык Күөл «Дьулуруйар Ньургун Боотур» стадионугар Күрэс төрүт көрүҥнэригэр «Манчаары оонньууларын» мас тардыһыытыгар киирсиилэр саҕаланыахтара. Финал аҥардаах уонна финальнай күрэхтэһиилэр от ыйын 10 күнүттэн буолуохтара. 70 кг ыйааһыҥҥа кыайбыт мадьыны быйылгы төрүөх түөрт убаһанан наҕараадаланыаҕа.
Иһитиннэриини уонна хаартыскалары М.Р. Егорова тиксэрдэ.
-
2
-
0
-
0
-
0
-
0
-
1
