Ол курдук, алтынньыга Ил Түмэн Ыччат дьыалатыгар, физическэй култуураҕа уонна успуорка сис кэмитиэтэ «Ыччат бэлиитикэтин эйгэтигэр олохтоох салайыныы уорганнарын өйөбүллэрин ырычааҕын тупсарыы» диэн тиэмэҕэ төгүрүк остуолу тэрийиэҕэ. Ыччат бэлиитикэтин сайыннарыы, ыччат көҕүлээһиннэрин өйөөһүн тула кэпсэтии ыытыллыаҕа. Ил Түмэн билимҥэ уонна үөрэххэ сис кэмитиэтин тэрийиитинэн, парламентарий-дьахталлар уопсастыбаннай кулууптарын кыттыытынан, күүһүнэн өттөйүүгэ дьиэ кэргэн быраабын араҥаччылааһыҥҥа анаммыт төгүрүк остуол былааннанар.
Ахсынньыга Ил Түмэн Урбааҥҥа уонна туризмҥа сис кэмитиэтигэр «Судаарыстыбаннай уонна муниципальнай наадыйыыга атыылаһыы хантараахтаах ситимигэр олохтоох бородууксуйаны оҥорооччулары өйөөһүн ырычаахтара» диэн тиэмэҕэ төгүрүк остуол ыытыллыаҕа.
Бу курдук, Аартыкаҕа туризм инфраструктуратын сайыннарыы, наркотигы утары, ньиэби хостооһуҥҥа уонна ньиэп бородуукталарын харайыыга, тиэйиигэ-таһыыга экология өттүнэн куттал суох буолуутун хааччыйыы, дьоҕус урбааны сайыннарыы, олохтоох аһы-үөлү оҥорооччулары өйөөһүн, тыа хаһаайыстыбатын үлэтин билиминэн арыаллааһын, судаарыстыбаннай уонна муниципальнай бибилэтиэкэлэр, оҕо төрөөһүнүн уонна оҕолоох ыаллары өйөөһүн, оскуола үөрэнээччилэрин үлэнэн иитии о.д.а. боппуруостарынан төгүрүк остуоллар, дьүүллэһиилэр, мунньахтар былааннаналлар.
Ил Түмэн Сир сыһыаннаһыыларыгар, айылҕа ресурсаларыгар уонна экологияҕа сис кэмитиэтэ «Кыраасданнарга сир учаастактарын биэрии уратыларын туһунан» федеральнай сокуону олоххо киллэрии хаамыытыгар Бырабыыталыстыба чааһын ыытыаҕа. Ону таһынан, норуот дьокутааттара ОДьКХ эйгэтигэр бүддьүөт ороскуотун аччатыы, үөрэхтэһиини сайыннарыы бырагыраама олоххо киириитин, судаарыстыба чааһынай биисинэһи кытары концессионнай сөбүлэһиилэрин туолуутун, тыа хаһаайыстыбатын өйөөһүҥҥэ олохтоох салайыныы уорганнарын боломуочуйаларын кэҥэтии барыллаан түмүктэрин, хаарбах дьиэлэртэн дьону көһөрүү бырагыраманан үлэ хаамыытын уо.д.а. тустарынан Бырабыыталыстыба дакылаатын истиэхтэрэ.
Күһүҥҥү сиэссийэҕэ өрөспүүбүлүкэ туруктаахтык сайдарыгар тирэх буолар көдьүүстээх быһаарыылары ылынар дьаһаллар былааннаннылар диэн Ил Түмэн пресс-сулууспата суруйар.
-
0
-
0
-
0
-
0
-
0
-
0
