Саҥа агротехнологическай кылаас Бэрэсидьиэн Владимир Путин көҕүлээбит «Ас-үөл куттала суох буолуутун технология өттүнэн хааччыйыы» национальнай бырайыагын чэрчитинэн, Саха Өрөспүүбүлүкэтигэр быйылгы 2025 сылтан киллэриллибит «АПК каадырдара» эрэгийиэннээҕи бырайыак иһинэн аһылынна.
– Тыа хаһаайыстыбата өрөспүүбүлүкэ экэниэмикэтин биир сүрүн хайысхата буолар, онон биһиги оҕолор бу салааны иһиттэн биллиннэр диэн, каадыры бэлэмниир үлэ тиһигин оскуолаттан саҕалыыбыт. Оскуолаларга тыа хаһаайыстыбатын тэрилтэлэрин исписэлиистэрэ кэлэннэр, лиэксийэ ааҕыахтара, оҕолорго хаһаайыстыба үлэтин-хамнаһы билиһиннэриэхтэрэ, эскуурсуйаҕа сырытыннарыахтара. Бигэ туруктаах хаһаайыстыбалар иитэр-үөрэтэр үлэҕэ үөрэ-көтө кыттыһалларыттан мин үөрэбин, – диэтэ тыа хаһаайыстыбатын уонна ас-үөл бэлиитикэтин миниистирин солбуйааччы Сахаяна Павлова.
Агротехнологическай кылаас хайысхатынан биотехнология уонна аһы-үөлү оҥоруу буолла, онон Ил Түмэн дьокутаата, «Өктөөп 50 сыла» тыа хаһаайыстыбатын кэпэрэтиибин салайааччы Тихон Скрябин өйөбүлүнэн кылаас астыыр тэрилинэн хааччылынна. Ону таһынан, оҕолор биология, химия, физика уонна математика биридимиэттэрин дириҥэтэн үөрэтиэхтэрэ.
Өрөспүүбүлүкэ бастакы агротехнологическай кылааһын аһыллыытыгар оскуола үөрэнээччилэрэ ыаммытынан үүтү сэппэрээтэргэ сүүрдэннэр, пластик иһиттэргэ сүөгэй куттулар.
«АПК-ҕа каадырдары» эрэгийиэннээҕи бырайыагынан быйыл агротехнологическай кылаастар Чурапчы улууһугар, И.Е. Федосеев-Доосо аатынан Дириҥ агрооскуолатыгар итиэннэ Мэҥэ Хаҥалас улууһугар, Сэбиэскэй Сойуус Дьоруойа Ф.К. Попов аатынан Баатара оскуолатыгар аһыллыахтара. Бу туһунан Ил Дархан уонна Бырабыыталыстыба пресс-сулууспата иһитиннэрэр.
Хаартыска: Ил Дархан уонна Бырабыыталыстыба саайтыттан.
-
1
-
0
-
0
-
0
-
0
-
0
