Тыа хаһаайыстыбатын уонна ас-үөл бэлиитикэтин министиэристибэтин сүөһү аһылыгын бэлэмнээһиҥҥэ суһал ыстааба иһитиннэрэринэн, былааннарын Жатай 129 % (450 т.) , Өлүөхүмэ улууһа 110 % (15 788 т.), Амма улууһа 110 % (33 703 т.), Уус Алдан улууһа 101% (31 297 т.) , Мэҥэ Хаҥалас улууһа 100 % (44 432 т.) толордулар.
Чурапчы улууһа 35 965 туонна, Ньурба улууһа 27 859 туонна, Сунтаар улууһа 26 700 туонна, Нам улууһа 25 777 туонна, Үөһээ Бүлүү улууһа 24 385 туонна, Бүлүү улууһа 20 634 туонна, Кэбээйи улууһа 9 674 туонна оту чөкөтөн, кыстыыр отторун хааччынарга эрэллээх иһэллэр.
Амма, Горнай, Нам, Таатта, Томпо, Уус Алдан уонна Хаҥалас улуустарыгар, барыта холбоон 176 мобильнай биригээдэ тэриллэн, 24 603 туоннаны чөкөттүлэр.
Өймөкөөн улууһугар халаан уута ходуһалары ылан, олохтоохтор ууну кэһэ сылдьан, 1 659 туоннаны оттоотулар. Кинилэр сүөһүлэрин-сылгыларын кыстаталларыгар аны биир тыһыынча туонна от наада.
Тыа хаһаайыстыбатын уонна ас-үөл бэлиитикэтин миниистирэ Артем Александров бу ый саҕаланыытыгар тиийэ сылдьан, балаһыанньаны билсэн баран, киин улуустартан оту атыылаһыыны тэрийэн, уу суолун баттаһа тиэрдэр, өрүстэри туоруур паромнарга харгыс суох буолуутун хааччыйар соругу туруорбута. Ол туһунан биһиги суруйан турабыт. Иллэрээ күн, ол эбэтэр балаҕан ыйын 9 күнүгэр, 180 (Уус Алдан улууһуттан 60, Мэҥэ Хаҥалас улууһуттан 120) туонна оту тиэйбит 14 массыыналаах бастакы холуонна хайы-сах Өймөкөөнҥҥө айаннаата.
-- Бу үлэ саҕаланыыта эрэ, Өймөкөөн улууһун халаантан эмсэҕэлээбит хаһаайыстыбаларыгар барыта 1 164 туонна от наада, ону уу суолун баттаһа тиэрдэр сорук турар, – диэтэ Артем Александров.
Хаартыска: эрэдээксийэ пуондатыттан итиэннэ Тыа хаһаайыстыбатын уонна ас-үөл бэлиитикэтин министиэристибэтин саайтыттан.
-
0
-
0
-
0
-
0
-
0
-
0
