Бу сыллар усталарын тухары манна нэһилиэк элбэх көлүөнэ оҕото иитиллэн, оскуола боруогар үктэммиттэрэ, идэлээх үлэһит дьон буолан, улуус уонна нэһилиэк тэрилтэлэригэр ситиһиилээхтик үлэлии-хамсыы сылдьаллар. Сорохтор эбээ, эһээ буолан олоробут.
Мин бу уһуйааҥҥа олох кыра сылдьан, ыстаадаттан киирэн, аҕыйах кэмҥэ сылдьыбытым, ол да буоллар үтүө өйдөбүл хаалбыт. Бүтүн нэдиэлэ устатыгар хоно сылдьан баран, өрөбүлгэ тарҕаһар күнү күүтэр туспа үөрүү буолара! Оскуола боруогун атыллаан, маҥнайгы кылааска киирэрбитигэр иитээччибит Татьяна Николаевна Семенова атаарбыта, ол хаартыскабын билигин да уура сылдьабын, кып-кырачаан дьоннор бэлэхтэрбитин наһаа үчүгэйдик ыга кууһан турабыт. Оччолорго уһуйаан маһынан оттуллар кирпииччэ оһохтоох мас дьиэлээҕэ, асчыттар ол оһоххо ас арааһын астаан аһаталлара. Урукку үлэһиттэр үлэҕэ бэриниилээхтэрин, эппиэтинэстээхтэрин билигин сөҕө саныыр. Мин оҕолорум эмиэ «Кэрэчээнэҕэ» сылдьыбыттара. Билигин сиэннэрим иитии-билии ылаары уһуйааннарыгар тиэтэйэ-саарайа бараллар. Уһуйааҥҥа туох ирдэнэрин толоро үөрэнэллэр, тэҥнээхтэрин кытта тэҥҥэ сайдаллар, улааталлар.
Эдэркээн сааһыттан үлэлээбит уопуттаах иитээччи Ольга Николаевна Аммосова салалтатынан, «Кэрэчээнэ» уһуйааччылара биир иллээх кэлэктиип буолан, ырыаны-тойугу, үҥкүүнү, уруһуйу, күөх үүнээйини биэбэйдээһини сэргэ тутан, кырачааннарга сөптөөх билиини биэрэллэр, доруобуйаҕа туһалаах илии-атах оонньууларыгар үөрэтэллэр. Манна араас сылларга үлэлээбит иитээччилэр, иитээччи көмөлөһөөччүлэрэ, асчыттар, харабыллар, таҥас сууйааччылар, ис-тас үлэһиттэр тэрилтэлэрин, кэлэктииптэрин туһунан олус истиҥник ахталлар.
Бу уһуйаантан кынат анньынан тахсыбыт Кирбэй дьоно-сэргэтэ бука бары таптыыр, күндүтүк саныыр «Кэрэчээнэбит» үлэһиттэрин, оҕолору, төрөппүттэри кэлэн иһэр үбүлүөйгүтүнэн истиҥник эҕэрдэлиибит. Чэгиэн-чэбдик доруобуйаны, дьоллоох олоҕу баҕарабыт. Айар үлэҕит өссө үрдүк таһымнаах буолуохтун!
Хаартыскалары Надежда Колодезникова ыытта.
-
0
-
2
-
0
-
0
-
0
-
0
