Быыстапкаҕа дойду бары эрэгийиэннэрин бэрэстэбиитэллэрэ түмсэн үлэҕэ ситиһиилэрин көрдөрдүлэр, тыа сирин сайыннарыыга, үлэни-хамнаһы тэрийиигэ бырайыактарын билиһиннэрдилэр, уопут атастастылар. Быйыл улахан болҕомто сыыппара технологиятын туһаныыга ананна, онуоха ыччат трегэ тэриллэн, устудьуоннар уонна эдэр исписэлиистэр саҥа хайысхалары билиһиннэрдилэр, эспиэртэри кытары көрүстүлэр.
Саха Өрөспүүбүлүкэтин дэлэгээссийэтэ быыстапка бары тэрээһиннэригэр көхтөөхтүк кытынна. Ол курдук, Тыа хаһаайыстыбатын билим чинчийэр үнүстүүтүн дэлэгээссийэтэ саҥа арыйыыларын сырдатан, улахан сэҥээриини ылла. Ирбэт тоҥноох сиргэ сүөһү сүмэһиннээх аһылыгын бэлэмнээһин технологиятыгар, сиилэһи уонна сенаһы оҥоруу саҥа ньыматыгар (ааптар тыа хаһаайыстыбатын билимин хандьыдаата Елена Пестерева) уонна хаһыы сылгытын аһатыыга «Биогельм» эбиилик (ааптар бэтэринээрийэ билимин дуоктара Людмила Коколова) түөрт кыһыл көмүс мэтээлинэн бэлиэтэннилэр.
Мэлдьи да буоларын курдук, агрооскуолалар үлэлэрэ эмиэ ситиһиилээх түмүктэннэ. Быыстапкаҕа кыттыбыт 13 агрооскуола 24 кыһыл көмүс, 6 үрүҥ көмүс уонна 2 боруонса мэтээлинэн наҕараадаланнылар! Хатастааҕы агрооскуола сублимация технологиятын туһанан балыктан уонна сир аһыттан оҥорбут бородууксуйата, натуральнай эбииликтэх тууһа, Тулагы агрооскуолатын этэ, Бүлүү улууһуттан Бөкчөҥөө агрооскуолатын түргэнник бэлэмнэнэр миинэ, чэйэ, Мэҥэ Хаҥалас улууһуттан Ороссолуода агрооскуолатын тумата, ыраах Муома улууһуттан Индигиир агрооскуолатын кучу отон, дөлүһүөнтэн чэйэ, сир аһыттан пастилата уо.д.а. үрдүктүк сыаналаннылар. Бу туһунан Тыа хаһаайыстыбатын уонна ас-үөл бэлиитикэтин министиэристибэтин пресс-сулууспата иһитиннэрэр.
Хаартыскалары Анна Сергучева хааччыйда.
-
0
-
0
-
0
-
0
-
0
-
0
