Ил Түмэн сис кэмитиэтин бэрэссэдээтэлэ Владимир Прокопьев, Ил Дархан сүбэһитэ Игорь Николаев олохтоох салайыныыга ылыллыахтаах сокуон барылын туһунан мустубут дьоҥҥо сиһилии быһааран биэрдилэр. Даҕатан эттэххэ, социальнай ситимнэргэ мөккүөрү таһаарбыт өрүттэри чопчулаабыттара биһирэбили эрэ ылыан сөп.
Владимир Прокопьев саҥа сокуон сүрүн түһүмэхтэрин билиһиннэрдэ, олохтоох бэйэни салайыныы ситимигэр быһаччы үлэлиир баһылыктартан, депутаттартан этиилэри кэтэһэллэрин бэлиэтээтэ, саҥа сокуон уратыларыгар тохтоото:
– Билигин Арассыыйаҕа олохтоох салайыныыны уларыта тутуу үһүс түһүмэҕэ ыытылла турар. «Аһаҕас былаас биир кэлим ситимигэр олохтоох салайыныыны тэрийии сүрүн тосхоллорун туһунан» 33 №-дээх федеральнай сокуон кулун тутарга ылылынна, бэс ыйыттан үлэлээн барда. Ирдэбил быһыытынан, ити сокуоҥҥа субъектар (кыраайдар, уобаластар, өрөспүүбүлүкэлэр) үс ый иһигэр сөп түбэһиннэриллибит бэйэлэрин сокуоннарын ылыныахтаахтар. Ол иһин алтынньы 27 күнүгэр «Саха Өрөспүүбүлүкэтигэр олохтоох салайыныы туһунан» Ил Түмэҥҥэ киирбит сокуон сэтинньи бүтүүтэ бастакы ааҕыыны ааһыахтаах, ахсынньы ыйга түмүктүүр үһүс ааҕыы тэриллиэхтээх. Сокуон кэлэр сыл тохсунньу 1 күнүттэн олоххо киириэхтээх. Ити кэмҥэ диэри быһаччы үлэлии сылдьар баһылыктартан, дьокутааттартан сокуон барылыгар, боломуочуйалары тыырыыга чопчу этиилэри күүтэбит.
Сүрүн уратыларын билиһиннэрдэххэ, саҥа сокуон субъектарга элбэх быраабы биэрдэ. Биһиэхэ олохтоох салайыныы икки таһыма оннунан хаалла. Урукку сокуон улуус уонна нэһилиэк таһымнарынан боломуочуйалары тыырбыт курдук эбит буоллаҕына, билигин субъект ким туох боломуочуйалааҕын бэйэтэ быһаарыахтаах. Боломуочуйа диэн ханнык баҕарар сокуоҥҥа сүрүн өрүт буолар. Билиҥҥи сокуоҥҥа боломуочуйа кэҥээтэ, ол эрэн, үбүнэн булгу хааччыйыыны ирдиир. Боломуочуйалар үбүлэниитэ суох улууска, нэһилиэктэр таһымнарыгар бэриллэр кыахтара суох. Боломуочуйалары иккис ааҕыыга, сорҕотун кэлэр сыл бастакы аҥарыгар чопчулуохпутун сөп.
Ил Дархан сүбэһитэ Игорь Николаев саҥа сокуон барылыгар элбэх санаа атастаһыытын таһаарбыт олохтоох былаас быыбарын ырытта. Кини сокуон барылыгарким да быыбардыыр бырааба кэһиллибэтин тоһоҕолоон бэлиэтээтэ. Сокуон барылынан улуус баһылыгар Ил Дархаҥҥа баартыйалар, уопсастыбаннай тэрилтэлэр уо.д.а. киллэрбит хандытааттарыттан оройуон Сэбиэтин дьокутааттара, тыа сирин түөлбэлэрин баһылыктарыгар хандьытааттары куонкурус хамыыһыйалара быһааран дьокутааттар көрүүлэригэр киллэрэллэрин билиһиннэрдэ. Улуус, нэһилиэк баһылыктарын тохтоторго дьокутааттар үс гыммыт иккилэрин сөбүлэҥнэрэ ирдэнэрэ этилиннэ.
Сокуон барылын дьүүллэһиигэ кыттыбыт баһылыктар Роман Софронов, Альберт Прокопьев, Алексей Васильев, Ян Попов, Ил Түмэн дьокутаата Егор Григорьев уо.д.а. сокуон барылыгар боломуочуйалары чуолкайдааһыҥҥа, муниципалитеттар бүгүҥҥү кыһалҕаларын быһаарыы саҥа сокуоҥҥа киирэригэр санааларын этиннилэр. Кэлэр сылларга олохтоох бэйэни салайыныыны сүрүннүүр саҥа сокуон барылын дьүүллэһиигэ Бүлүүгэ аһаҕас кэпсэтии таҕыста.
Бүлүү куорат дьокутааттарын Сэбиэтин бэрэссэдээтэлэ Николай Харлампьев:
— Бүгүҥҥү кэпсэтии түмүгүнэн бэйэм мунаарар боппуруостарбар үчүгэй быһаарыылаах эппиэттэри иһиттим. Олохтоох бэйэни салайыныы сокуонун бырайыага инникитин дойдубут сайдарыгар, эдэр ыччат үөрэхтээх, үлэлээх, дьоһун дьон буола үүнэллэригэр улахан күүс буолуо диэн суолталаах мунньах кэнниттэн эрэллээх хааллым.
Хаартыска: ааптар түһэриитэ.
-
0
-
0
-
0
-
0
-
0
-
0
