Санатан этэр эбит буоллахха алтынньы 27 күнүгэр Ил Түмэҥҥэ 33 №-дээх федеральнай сокуон иитинэн, өрөспүүбүлүкэҕэ олохтоох бэйэни салайыныы сокуонун барылын киллэрбиттэрэ. Ол инниттэн да, күн бүгүнүгэр диэри дьон-сэргэ санаатын бутуйар, олоҕо суох куолулааһын аһары элбээбититтэн сылтаан, Алексей Еремеев аҥардас социальнай ситим эрэ нөҥүө буолбакка, саха киһитин сиэринэн атах тэпсэн олорон бүгүҥҥү мунньаҕы дириҥ ис хоһоонноохтук, дьону мунаардыбат гына хорутуулаахтык ыытта. Кинини сэргэ төгүрүк остуолга Уопсастыбаннай-сүбэлиир сэбиэт чилиэнэ, Төрүт сокуон суутун судьуйата Макар Яковлев, норуот дьокутааттара Павел Пинигин, Дмитрий Поисеев кыттыыны ыллылар.
Нэһилиэк баһылыктарыгар, улуус, нэһилиэктэр дьокутааттарыгар, уопсастыбаннаска анаан олохтоох бэйэни салайыныы сокуонугар киирэр уларыйыылар суолталарын, былаас араас таһымнаах боломуочуйаларын наардааһын туһунан сиһилии быһаардылар, дьон-сэргэ этиитин болҕойон иһиттилэр, туһааннаах ыйытыктарга толору хоруйдаатылар. Боломуочуйа өттүгэр олохтоох бэйэни салайыныы икки таһымнаах хааларын, үөрэҕирии ситимэ улуустарга оннунан хаалыахтааҕын өссө төгүл тоһоҕолоон бэлиэтээтилэр. Араас оруна суох куолулааһыннары истибэккэ биир санаалаах буоларга ыҥырдылар.
Уйбаан Пономарев, Чурапчы улууһун Бочуоттаах олохтооҕо, 87 саастаах:
– Бүгүн сүрдээх үчүгэй көрсүһүүнү тэрийэн бардылар. Эрдэ Конституцияҕа уларытыылар киириилэрин соччо өйдөөбөт этим, бүгүн балачча өйдөөтүм уонна уопсайынан сөп соҕустар эбит диэтим. Аны Конституция итинэн ылыныллан бүттэ диэбитим, аны үһүс болдьоххо ахсынньыга бигэргэнэр эбит, өссө сийиэс буолар эбит. Онно биири этэбин — олохтоох салайыныыга сокуон ылылынна, олохтоох салайыныыга нэһилиэктэр боломуочуйаларын улаатыннарарга туруорсуохха. Онно тыа хаһаайыстыбатыгар үбүлээһини, субсидиялар тиийиилэрин ситиһиэххэ наада.
Игорь Николаев, Төлөй нэһилиэгин баһылыга:
– Алексей Ильич халыҥ хамаандалаах кэлэн олус үчүгэйдик, аһаҕастык кэпсээтилэр. Нэһилиэнньэ мунаахсыйа сылдьыбыт боппуруостарын чопчулаан биэрдилэр. Билигин уларыйыылар киириилэригэр бары бэлэм буолуохпутун наада, олус улахан үлэлэр күүтүллэллэр эбит. Ол сокуон норуокка анаан оҥоһулларынан, үлэни-хамнаһы ыытар дьоммутугар махтанабыт уонна биир санаанан дойдубут, өрөспүүбүлүкэбит сайдарын туһугар үлэлииргэ эрэллээхпин.
Бу суолталаах көрсүһүүгэ нэһилиэк баһылыктара Антон Янцен, Людмила Ефремова, Владимир Сивцев, Иннокентий Барашков уонна интэриэстээх олохтоохтор Уйбаан Пономарев, Ульяна Атласова, улуус мунньаҕын дьокутаата Василий Платонов тоҕоостоох боппуруостарга санааларын үллэһиннилэр.
Хаартыска: Василий Кононов.
-
0
-
0
-
0
-
0
-
0
-
0
