Афанасий Харлампьев бааһынай хаһаайыстыбатын 2003 с. тэриммитэ. Күн бүгүн 204 сүөһүлээх, ол иһигэр 80 ыанар ынахтаах. Хаһаайыстыба «Туйгун -Ас» астыыр сыаҕы тэринэн, үрүҥ ас арааһын, сыырыгар тиийэ астыыр. Бородууксуйатын Бүлүү улууһугар уонна Дьокуускайга аҕалан батарар. Онон киин куорат олохтоохторо лөкөй кыыллаах Лөкөчөөн сибиэһэй сүөгэйин уонна сыырын үчүгэйдик билэллэр, хамаҕатык атыылаһаллар.
Хаһаайыстыбаҕа Харлампьевтар дьиэ кэргэнинэн үлэлииллэр. Ол курдук, ыал аҕа баһылыга Афанасий Кузьмич уопсай үлэни-хамнаһы сүрүннүүр буоллаҕына, улахан уол Кузьма тиэхиньикэ өттүн, тиэйэр-таһар үлэни дьаһайар, орто уол Максим астыыр сыаҕы үлэлэтэр. Оттон кыра уол Гаврил сиртэн үүнээйини ылыы салаатын моой-арҕас ылынан дьаһайар. Бу курдук туруу үлэһит ыал киинтэн ыраах сытар нэһилиэккэ үлэни-хамнаһы тэрийиигэ улуустарыгар үтүө холобуру көрдөрөллөр.
Саҥа туттан үлэҕэ киллэрбит сүөһү иитэр комплекстара аныгы матырыйаалынан тутулунна, толору хааччыллыылаах буолан, үлэлииргэ-хамсыырга тупсаҕай. Эбийиэк уопсай сыаната 42,28 мөл солк. харчы эбит, онтон Тыа хаһаайыстыбатын уона ас-үөл блиитикэтин министиэристибэтэ ынаҕы ыыр тэрили, үүт ситимин итиэннэ газгольдеры атыылаһарга 18,28 мөл солк көрбүт, Бүлүү улууһа бэйэтин бүддьүөтүттэн 4 мөл солк көрбүт, атын ороскуотун хаһаайыстыба бэйэтэ уйуммут.
Даҕатан эттэххэ, Бүлүү улууһа гааһы төһө миинэ сыттар, Лөкөчөөн нэһилиэгэ ыраах уонна кытыы буолан, манна «күөх төлөн» кэлэрэ-кэлбэтэ биллибэт, дьэ онуоха хаһаайыстыба газгольдердаах хочуолу туһанан, ороскуоту аччатарга быһаарыммыта атыттарга холобур буолуохтун.
Малааһыҥҥа нэһилиэк олохтоохтор бары сырыттылар, кинилэр үөрүүлэрин тыа хаһаайыстыбатын уонна ас-үөл бэлиитикэтин миниистирин солбуйааччы Николай Афанасьев үллэһиннэ. Салааҕа ыытыллар үлэ-хамнас, инники былааннар тустарынан кэпсээтэ, бастыҥ үлэһиттэргэ наҕараадалары туттарда.
Хаартыска: Леонид Молчанов итиэннэ Тыа хаһаайыстыбатын уонна ас-үөл бэлиитикэтин министиэристибэтин пресс-киинэ.
-
1
-
0
-
0
-
0
-
0
-
0
