Бу тэрээһини Хаҥалас дьаһалтатын улууһа, II Дьөппөн нэһилиэгин дьаһалтата уонна уопсастыбаннай көҕүлээччи Галина Иванова тэрийэн ыыттылар. Быйыл күһүн Тиихэй акыйааннааҕы флот тэриллибитэ 295 сылынан сибээстээн, Владивостоктан муора флотун ассоциациятын бэрэссэдээтэлэ Александр Путятин, бу тэрилтэ сэкирэтээрэ Игорь Вичевич уонна олохтоохтор кытыннылар.
Биһиги өрөспүүбүлүкэтээҕи «Оһуокай» түмсүүттэн алта этээччи тахсан, үөрүүлээх чаас кэнниттэн өбүгэ уустарбытыгар анаан Сүгүрүйүү оһуокайын түһүлгэтин төрүттээтибит. Ааспыт 16 үйэттэн саҕалаан бу түөлбэ уустара болгуо тимири хостоон уһааран, Арассыыйа Тиихэй акыйааннааҕы флотугар хараабыллары оҥорууга улахан көмөнү оҥорбуттар, 60 хараабыл биһиги уустарбыт уһаарбыт тимирдэринэн оҥоһуллубут. Ол туһунан сурукка-бичиккэ докумуонунан бигэргэммит. Ол иһин Владивостоктан муоратааҕы флот ассоциациятыттан хараабыл шлюпкатын дубляж дьоҕус куолакалын аҕалан туттардылар уонна түмэл аттыгар Арассыыйа Федерациятын, Саха Өрөспүүбүлүкэтин итиэннэ Андреевскай былааҕы ииллилэр.
Оһуокайдьыттар өбүгэлэрбитигэр махтанан, Сүгүрүйүү оһуокайын таһаардыбыт. Владивостоктан анаан-минээн кэлбит ыалдьыт Александр Путятин бар дьон ортотугар Хаҥалас улууһуттан уустар үтүө суолларын үөрэтэн тарҕата сылдьар уопсастыбанньык Галина Васильевна Ивановаҕа ассоциация чилиэнэ буоларын туоһуолуур сибидиэтэлистибэни туттарда.
«Оһуокай» түмсүү этээччилэрэ тахсан, Сүгүрүйүү түһүлгэтин төрүттээбиттэригэр олохтоох дьаһалта баһылыга Ольга Апполлоновна салайааччыбыт Александр Даниловка хамаанда таһааран оһуокайы тэрийбитигэр нэһилиэк олохтоохторун аатыттан махталын биллэрдэ.
Хаартыска: ааптар түһэриитэ.
-
48
-
3
-
0
-
0
-
0
-
0
