Фронт туһатыгар диэн 1942-1946 сс. Көһөрүллүүгэ утаарыллыбыт биир дойдулаахтарын сырдык ааттарыгар сүгүрүйэн, Чурапчы улууһун тэрилтэлэрин идэлээх сойуустарын сүрүннүүр Сэбиэтин хамсааһына бэлэсипиэтинэн сүүрүүнү тэрийдэ.
Чурапчы дьоно хоту Көһөрүллүүттэн эргиллэн кэлиилэрин ситиспит бөдөҥ судаарыстыбаннай-политическай диэйэтэл, Нам улууһуттан төрүттээх Илья Винокурову улуус олохтоохторо умнубаттар. Илья Егорович 130 сылын бэлиэтээһин чэрчитинэн, ытык томторго киниэхэ анаммыт мемориальнай дуосканы туруордулар.
Ону арыйыы сиэригэр-туомугар улууспут баһылыга Степан Саргыдаев, улуус дьокутааттарын Сэбиэтин бэрэссэдээтэлэ Яков Оконешников уонна Нам улууһун баһылыга Юрий Слепцов, Ленскэй нэһилиэгин баһылыга Петр Сокольников кытыннылар, саҥа аһыллыбыт өйдөбүнньүккэ сибэкки дьөрбөтүн уурдулар. Оччотооҕу уустук сылларга норуотун туһугар турууласпыт, өрөспүүбүлүкэ сайдыытыгар улахан өҥөлөөх саха саарынын туһунан үтүө махтал тылынан ахтан-санаан аастылар.
Салгыы хоту Көһөрүллүүгэ сырдык тыыннарын толук уурбут ытык көлүөнэ дьоммутун ахтар-саныыр, кинилэр тугунан да кэмнэммэт ыар алдьархайдарын үүнэр ыччаттарга тиэрдиигэ, албан ааттарыгар сүгүрүйүүгэ туһуламмыт кутурҕан миитинэ буолла.
Күн бүгүн Чурапчы улууһугар Көһөрүллүү 46 кыттыылааҕа олорор. Эһиил хоту Көһөрүллүү 85 сыла бэлиэтэнэр. Онон сибээстээн, өрөспүүбүлкэ таһымыгар хамыыһыйа тэриллэн, былааннаах үлэ-хамнас ыытыллыаҕа. Ол курдук, Хатылы нэһилиэгэр Көһөрүллүүгэ анаммыт саҥа түмэл дьиэтин тутуу, научнай-практическай кэмпириэнсийэлэр, Кэбээйи, Булуҥ, Эдьигээн улуустарын кытары сөҥнөһөн, үйэтитиигэ анаммыт дьаһаллары тэрийии, пааматынньыктары сөргүтүү, саҥа өйдөбүнньүктэри тутуу о.д.а үлэлэр былааннаналлар.
Аҕа дойду Улуу сэриитин сылларыгар икки бүк иэдээни көрсүбүт Чурапчы алдьархайа хаһан да хатыламматын, Кыайыы туһугар сырдык тыыннарын толук уурбут, дойдуларыгар этэҥҥэ эргиллэн, эйэлээх олоҕу уһаммыт ытык дьоммут хорсун быһыылара үүнэр көлүөнэҕэ үтүө холобур буола, үйэтитиллэ туруоҕа.
Хаартыска: Сэмэн Жендринскэй, "Саҥа олох" хаһыат.
-
0
-
0
-
0
-
0
-
0
-
0
