Онно тустаах биэдэмистибэлэр, билим, биисинэс уонна уопсастыбаннас бэрэстэбиитэллэрэ кытыннылар. М.Г. Сафронов аатынан ТХНЧИ дириэктэрэ Михаил Черосов икки хайысха сүрүн суолтатын быһаарда: "Аартыка – экология өттүнэн ыраас эрэгийиэн, оттон биоэкэниэмикэ Арассыыйа күрэстэһиигэ инники күөҥҥэ сылдьар кыахтаах хайысхата буолар, тоҕо диэтэххэ, биһиэхэ тыытыллыбатах баай айылҕа уонна Аартыка саамай киэҥ сирэ-уота баар».
Тыа хаһаайыстыбатын уонна ас-үөл бэлиитикэтин миниистирин солбуйааччы Айаал Тимофеев Бэрэсидьиэн Владимир Путин Трансаартыка тырааныспардын көрүдүөрүн устун экопоселениелары тэрийии боппуруоһун үөрэтэргэ сорудахтаабытын санатан, баар баасаҕа (табаны иитиигэ, балыктааһыҥҥа уонна сир аһыгар) тирэҕинэн оҥоһуллубут биоэкэниэмикэ мадьыалын билиһиннэрдэ. Биир табаттан 27 киилэ суббородуукта ылыллар эрээри, 20 %-а эрэ туһаныллар, балыкка эмиэ итинник, дьэ ону туһаҕа таһааран, бэйэбит учуонайдарбыт сүбэлэринэн коллаген, пептид, БАД оҥорорго туттуохха сөп, онуоха аҕа ууһун общиналарыгар, кэпэрэтииптэригэр соҕотуопкалыыр-астыыр пууннары тэрийэр ирдэнэр. Мадьыал үс түһүмэхтээх: тута тоҥоруу, куурдуу, астыыр-таҥастыыр үлэ итиэннэ Трансаартыка тырааныспардын көрүдүөрүнэн баахта бөһүөлэктэрин, муора аалларын сибиэһэй бородууксуйанан, сир аһынан хааччыйыы, биологическай тобохторунан уоҕурдуу, биогаас оҥоруу.
«Экспорды өйөөһүн киинэ» аптаныамынай тэрилтэ дириэктэрэ Марина Сукуева балык бородууксуйатын Кытай ырыынагар таһаарыы кэскилин сырдатта, Уһук Илиҥҥэ күрэстэһии улаханын быһыытынан, балыктан коллагеннары, пептидтэри, гидролизатордары, араас ингредиеннары оҥорор ордук буолуоҕун эттэ.
Сиэссийэ кыттыылаахтара өрөспүүбүлүкэҕэ сөптөөх бааса баар (Саха Өрөспүүбүлүкэтин Аартыкатааҕы түбэтигэр тыа хаһаайыстыбатын сайыннарыы 2035 сылга диэри кэнсиэпсийэтэ бигэргэннэ, таба ахсаана элбээн, 176 тыһыынчаҕа тиийдэ, 2020 с. – 152 тыһыынча этэ, дойдуга бастакы ирбэт тоҥҥо кыһыннары үлэлиир «Саюри» тэпилииссэ комплекса, Аартыка 13 улууһугар Эргиэн-логистика кииннэрэ үлэлииллэр) диэн тоһоҕолоон эттилэр.
Бөлөхтөрүнэн араас салааларынан хайдыһан үлэлээтилэр, түмүк этиилэрин сиэссийэҕэ иһитиннэрдилэр. Ол иһигэр бааллар: 2027 сылга үс-биэс соҕотуопкалыыр-астыыр пууннары пилотнай бырайыак быһыытынан тэрийии, өрөсүүрсэни инвентаризациялааһын, кылгас болдьоххо общиналар каадырдарын бэлэмниир бырагырааманы оҥоруу, агробиотехнопаарк нөҥүө федеральнай субсидияҕа сайаапка түһэрии, олохтоох бородууксуйаны соҕотуопкалааһыҥҥа Тиксии, Певек уонна Хатанга пуортарын кытары сөбүлэһиини түһэрсии.
Түмүккэ Аартыка биоэкэниэмийэтэ диэн экэнэниэмикэни таһынан социальнай хайысхалааҕын бэлиэтээтилэр диэн Тыа хаһаайыстыбатын уонна ас-үөл бэлиитикэтин МАХ ханаала суруйар.
Хаартыска: Тыа хаһаайыстыбатын уонна ас-үөл бэлиитикэтин МАХ ханаала.
-
0
-
0
-
0
-
0
-
0
-
0
