Ил Түмэн сир сыһыаннаһыыларыгар, айылҕа баайыгар уонна экологияҕа сис кэмитиэтин бэрэссэдээтэлэ Сахамин Афанасьев бэйэтин дакылаатыгар бултуур сиргэ айылҕабыт ураты харыстанар сирдэриттэн ураты быраап эрэсиимэ дьон бултууругар көҥүллүүргэ соруйарын бэлиэтиир. Ураты харыстанар сирдэргэ айылҕатын баайын (мас кэрдиитэ, кыылын бултуура) туһаныы барыта сокуоҥҥа олоҕуран оҥоһуллар.
Парламентарий бэлиэтииринэн, киһи көҥүллүк бултуур сирдэрэ булт сирин уопсай иэнин 30 %-тан кыра буолуо суохтаах. Бу нуорма дьон бултууругар сирин иэнин кэҥэтэр сыаллаах киллэриллэр.
Сокуон барыла муниципальнай оройуоннар эбэтэр куорат уокуруктарын кыраныыссаларыгар бэрэстэбиитэллээх уорганнар быһаарыныыларыгар, СӨ Ил Дархана бигэргэппит бултуур сир туһанар уонна харыстанар схематыгар олоҕуран киһи көҥүллүк бултуур сирин иэнин олохтуур. Судургутук быһаардахха, улуустарга уонна куораттарга бултуур сирдэрин уопсай иэниттэн киһи көҥүллүк 20 %-гар сылдьан бултуон сөп.
Маны тэҥэ 11 ыстатыйаҕа уларытыылар киирэллэр. Бултанар кыылга көҥүлү үллэрии, ол эбэтэр чопчу хайа эрэ кыылга бултуйуу нуормата олохтонор, ону олохтуурга чопчу ахсаанын быһаарарга үс тэҥ өлүүскэҕэ үллэрэллэр.
Итиннэ сыһыаннаан физическэй сирэйдэр бултуулларыгар бултуур сирдэрин иэнин итиэннэ бултуйуу нуорматын хайдах тэҥник үллэрэр туһунан норуот дьокутаата Гаврил Алексеев чопчулуур ыйытыы биэрдэ.
Тустаах кэмитиэт бэрэссэдээтэлэ быһаарарынан, дьоҥҥо бултуурга көҥүлү, онно бултуйуу нуорматын биэрэргэ лоп курдук бырыһыаҥҥа үллэрэр быраактыка да өттүттэн кыаллыбат. Тоҕо диэтэр бултуурга көҥүлү биэрии ахсаана араастаһар уонна бырыһыанынан үллэриигэ сөп түбэспэт. Ол иһин бултуурга көҥүлү биэриигэ, бултуйуу нуормата олохтуурга, чопчу ахсаанын быһаарарга үс тэҥ өлүүскэҕэ үллэрэргэ уларытыылар киириэхтээхтэр.
Ырытыһыы кэннэ сокуон барыла бастакы ааҕыыга ылылынна.
-
0
-
0
-
0
-
0
-
0
-
0
