Онлайн семинарга оскуолаҕа үөрэх уонна наука хайысхатын сүрүннүүр завучтар, уһуйаан ыстаарсай баспытааталлар, методическай холбоhуктар салайааччылара, эбии үөрэхтээhин методистара, кылаас салайааччылара кыттыыны ыллылар. Уопсайа 200-чэкэ педагог Интернет ситимигэр холбосто. Тэрээһин Саха ϴрөспүүбүлүкэтин үөрэҕин уонна наукатын министиэристибэтэ бигэргэппит былааныгар олоҕуран тэрилиннэ. Онтон бу үлэни сүрүннээччинэн «Юные якутяне» республикатааҕы тирэх киин буолар.
Семинары «Эркээйи эргиирэ» бырагыраама ааптардара: педагогическай наука кандидата, Саха ϴрөспүүбүлүкэтин үөрэҕириитин үтүөлээх үлэhитэ Екатерина Чехордуна уоннафилософскай наука кандидата, Саха ϴрөспүүбүлүкэтин үтүөлээх учуутала Валентина Степанова ыыттылар. Семинар модераторынан «Юные якутяне» республикатааҕы тирэх киин үлэһитэ, «Эркээйи эргиирэ» бырагыраама олоххо киириитин сүрүннээччитэ Геннадий Охлопков үлэлээтэ.
Екатерина Петровна «Аныгы кэмҥэ төрүт үгэстэри тутуhан сайдар эйгэни тэрийии» диэн тиэмэни киэҥник хабан арыйда. Биир-биир өйдөбүллэргэ олоҕуран, уһуйааҥҥа, оскуолаҕа, эбии үөрэхтээһин тэрилтэтигэр ханнык үлэ көрүҥүнэн ситиһиллиэн сөбүн ыйда.
Болҕомтотун ордук киирээри турар «Оскуола иитии үлэтин бырагырааматыгар» туһаайда. «Бастаан бэйэ үлэтин, буола турар быһыыны-майгыны ырытан көрүллүөхтээх, салгыы «Эркээйи эргиирэ» этэр санаатыгар сөп түбэһиннэрэн сааһыланыы барыахтаах, онтон учуутал, педагог кыайар хайысхаларынан дириҥээн, саҥа таһымҥа тахсыахтаах», – диэн бэйэтин сүбэлэрин анаата.
Валентина Егоровна «Тус бэйэни «Өй-санаа» уонна «Дьарык» эйгэтигэр сайыннарыы сэhэнэ» диэн тиэмэни «Айыы кыһатыгар», «Сэргэлээх» оскуолатыгар кэллиэгэлэрин кытта айымньылаахтык үлэлээн ситиспит түмүктэригэр олоҕуран, сайыннарыылаах үөрэх ис хоһоонун сэһэргээтэ.
Маныаха «учуутал» халыыбыттан тэйэн, «уһуйааччы» таһымыгар тахсар, «Уруок» өйдөбүлүттэн тахсан, «Дьарык» ис хоһоонугар умсар кэм кэлбитин тоһоҕолоон бэлиэтээтэ. «Бу түмүгэр эйгэ киһитийиэхтээх, олохтон үөрэнэр үөрэнээччи модела олоҕуруохтаах. Ол аата тус бэйэни сайыннарар үөрэх сэһэнэ – «киһини киһиэхэ төнүннэрии, омугу омукка төнүннэрии», – диэн бэлиэтээн туран, ис хоһоонноох үлэҕэ ыҥырда.
Семинар кыттыылаахтара тэрээһин практическай үлэҕэ хайысхалыыр, баһаччы дьайар суолталаммытын бэлиэтээтилэр, салгыы үлэлииргэ интэриэс күөдьүйбүтүн, баҕа санаа үөскээбитин эттилэр.
Түмүккэ киирбит ыйытыыларга хоруйдаан, сүбэ-ама бэрилиннэ. Семинар бүтүүтүгэр иһитиннэрбиттэринэн, тэрээһиҥҥэ кыттыбыт дьон бары Саха ϴрөспүүбүлүкэтин Үөрэҕин уонна наукатын министиэристибэтин, «Юные якутяне» республикатааҕы тирэх киин аатыттан электроннай сертификаттары тутуохтара.
Түгэнинэн туһанан, бырагырааманан үлэлиэн баҕалаах бары тэрилтэлэри «Эркээйи ситимэ» диэн бассаап бөлөххө ыҥырабыт. Билсэр нүөмэргит: 8(984) 107-78-16. Сайдар эйгэни олохтуурга бары турунуоҕуҥ!
«Юные якутяне»
республикатааҕы тирэх киин
пресс-сулууспата,
төл. 319-320
-
0
-
0
-
0
-
0
-
0
-
0
