Өбүгэбит оҕону иитэр биир сүрүн үгэһэ – оҕону тылынан-өһүнэн буойуу, тылы иһитиннэрии, тылынан мээнэ ыһыахтаммакка, эппит тылга турарга үөрэтии - маны барытын биир күнүнэн буолбакка, кыра саастарыттан иитэн-такайан, сэһэннэри, номохтору кэпсээн, үчүгэй киһини хайҕаан, мөкүнү сирэн, остуоруйалаан, чабырҕахтаан, өс хоһоонунан бары көстүүнү быһааран, чахчы даҕаны, тылынан иитии чыпчаалыгар тиийбит дьон, өбүгэлэрбит. Билиҥҥэ диэри сатаан саҥарар, кэрэхсэбиллээхтик кэпсиир киһини бары да сэҥээрэбит, сөбүлээн истэбит, устар күн тухары истэ олоруохпутун баҕарабыт.
Олунньу – тыл ыйа. Үгэс курдук, олунньу ый саха дьонугар өрө көтөҕүллүүлээхтик ааһар, сахалыы таҥнабыт, саха мааны аһын астыыбыт, оһуохайдары төрүттүүбүт, тылбыт-өспүт чобуорхайар, төрөөбүт тылбыт барахсан сир-сир аайы болҕомтоҕо ылыллан, күүһүн-уоҕун ылынар, тиллэр-тыллар күннэрэ үүнэллэр.
Олунньу ый устата эбэлэрбит уонна эһэлэрбит, хос эбэлэрбит, хос эһэлэрбит мүнүүтэ устата өс хоһоонун быһааран устан ыытан күрэххэ кытыннылар. Барыта 82 үлэ киирдэ. Сахабыт сирин элбэх улууһуттан үлэлэри туттубут: Таатта, Мэҥэ Хаҥалас, Чурапчы, Орто Халыма, Өлөөн, Амма, Хаҥалас, Сунтаар, Дьааҥы, Уус Алдан, Бүлүү, Нам, Ньурба, Томпо, Үөһээ Бүлүү, Кэбээйи, Өлүөхүмэ уонна Дьокуускай куораттан. Сорох оҕолорбутугар икки өттүттэн эбэлэрэ, эһэлэрэ, сорох оҕолорго хос эбэлэр, хос эһэлэр кыттыбыттара кэрэхсэбиллээх. Саамай эдэр кыттааччы 47 саастаах, саамай аҕа саастаах кыттааччы 91 саастаах.
Сунтаар Түбэй Дьаарханыттан Нина Ильинична, Фрументий Петрович Сафроновтар (''Үрүмэччи'' бөлөх) “Сүрэҕэ суох сүүс сүбэлээх” диэн өс хоһоонун инсценировка оҥорон көрдөрбүттэр.
Хаартыскаҕа Сафроновтар
Уус Алдан Бороҕонуттан Изабелла Семеновна, Афанасий Валерианович Афанасьевтар (''Сир Симэҕэ'' бөлөх) “Арыы үрдүгэр уу дагдайбат, кырдьык үрдүгэр сымыйа ыттыбат” өс хоһоонун мас арыылаах ыстакааҥҥа ууну кутан, өс хоһоонугар этиллэри оҕо чуо өйдүүрүн курдук, илэ-чахчы быһаардылар.
Амма Сатаҕайыттан Семен Семенович Яковлев, 91 саастаах хос эһэ (''Кустук'' бөлөх) “Аччыкка аҥылах да уута амтаннаах, тотко тутум да хаһа сириилээх” диэн сонун тыллаах өс хоһоонун ыыппыт. Манна “аҥылах” диэн тылы билбэккэбит, “Саха тылын быһаарыылаах улахан тылдьытыттан” булбаккабыт, хос эһэбититтэн бэйэтиттэн ыйытарга күһэлиннибит. Лоп-бааччы быһааран биэрдэ, “аҥылах уута – тар уута – аһыйбыт суорат уута” диэн суолталааҕын биллибит.
Хаартыскаҕа Семен Семенович Яковлев
Дьокуускай куораттан Ирина Егоровна Егорова-Чойнова (''Кулунчук'' бөлөх) “Күөскүн эрдэттэн өрүнүмэ” өс хоһоонун сиэнинэн Саас-Кылаана Ли-нан кэпсэттэрбит. Кырачаан киһи холкутук быһааран биэрдэ, билэрэ, эбэтэ сиэнин тылын-өһүн имитэрэ, сахалыы толкуйга үөрэтэрэ көһүннэ.
Ити курдук бииртэн биир кэрэхсэбиллээх үлэлэр киирбиттэрэ. Биһиги оҕо тылын, сахалыы толкуйун сайыннарар үлэбитигэр, эһэлэрбит, эбэлэрбит, хос эһэлэрбит, хос эбэлэрбит ыраах да олордоллор, бэйэлэрин сүрэхтэрин сылааһынан көмөлөһө, сүбэ-ама буола олороллоро олус үөрдэр.
Хаартыскаҕа Амма Алтанатыттан Алтаана Алексеевна Артемьева.
Хаартыскаҕа Тааттаттан Николай Павлович Находкин
Күндү дьоммутугар чэгиэн доруобуйаны, уйгу-быйаҥ тулалаах нус-хас олоҕу баҕарабыт, оҕолоргут, сиэттэргит, хос сиэттэргит олохторун сырдатан, биһигини барыбытын үөрдэн, уһуннук дьоллоохтук олоруҥ диэн алгыспытын ыытабыт!
Күндү ааҕааччылар, өс хоһооннорун бу сигэлэринэн киирэн көрүөххүтүн сөп:
Сайт: https://ykt-dou51.obr.sakha.gov.ru/
ВК: https://vk.com/public217195652
Жанна БАРАШКОВА,
Дьокуускай куорат 51 №-дээх “Кэскил” уһуйаан социальнай педагога
-
1
-
0
-
0
-
0
-
0
-
0
