Кулун тутар 2 күнүгэр СѲ тас сибээскэ уонна норуоттар сыһыаннаһыыларыгар миниистирэ Владимир Кириллин салайааччылаах иккис бөлөх Бүлүүчээн, Наахара, Куокуну олохтоохторун кытары көрүстэ.
Бүлүүчээн олохтоохторо уот кыамтата мөлтѳҕүн, подстанция уларытыытын түргэтэтэр наадатын, хамнас ааҕыытыгар хотугу надбавканы саҥалыы көрөр кэм кэлбитин, ол тыа сиригэр дьон олохсуйарыгар тѳhүү буолуоҕун, бөһүөлэк иһинээҕи уонна оттуур-мастыыр сирдэргэ тиийэр суоллары өрөмүөннүүргэ өрөспүүбүлүкэттэн үп көрүллэрэ наадалааҕын эттилэр. Ону тэңэ оруобуйа харыстабылын эйгэтигэр дьон доруобуйатын көрүүгэ-истиигэ цифровой сибээһи күүскэ туһаныахха, ыраах сытар нэһилиэктэргэ телемедицина кѳмѳтүнэн быраас консультациятын элбэтиэххэ, Киин балыыһа лабораторияларын анаалыс ылыыга туттуллар матырыйаалларынан аан бастакынан хааччыйыахха, реактивтары элбэтиэххэ диэн эттилэр, сүрүн кыhалҕанан икки сыл бырааhа суох олороллорун ааттаатылар. .
Оттон Наахара олохтоохторун ааспыт сыллааҕы 8 туруорсуулара боротокуолламмыт, онтон түөрдэ быһаарыллан, үлэҕэ ылыллыбыт. Наахараҕа оскуола-саад тутуутун туруорсаллар. Быйыл бырайыага оҥоһуллан, экспертизаны ааһарын күүтэллэр. Олохтоохтор: «Ѳртөөһүн көҥүллэнэрэ буоллар, оттуур сирдэрбитин сэтиэнэхтэн өрүһүйүө эбиппит. Үүнүү да хаачыстыбата тупсуо этэ», - дииллэр.
Бүлүү, Лена өрүстэри туоруур муосталар тутууларын тустарынан ыйытыыга СӨ тырааныспарга уонна суол хаһаайыстыбатыгар миниистирин бастакы солбуйааччы Анатолий Потапов: "Билигин Үөһээ Бүлүү аннынан өрүһү туоруур муоста тутуутун бырайыага оҥоһуллан, эбии үп-харчы быһаарыллан быйыл тутуута саҕаланыаҕа. Оттон Күндээдэ, Устье, Кириэстээх аннынан муосталар бырайыактара эмиэ оҥоһулла сылдьаллар", - диэн иhитиннэрдэ.
Куокунуга олохтоохтор саҥа исписэлиистэри олорор дьиэнэн хааччыйыыга, чааhынай секторы киин ититиигэ холбооhуңңа, Аартыкаҕа тэриллибитин курдук Дьокуускайтан быраастар мобильнай биригээдэлэрэ кэлэрин хааччыйыыга, анал байыаннай дьайыыга сылдьар дьонноох дьиэ кэргэттэргэ уот төлөбүрүн чэпчэтиигэ уо.д.а сыhыаннаах ыйытыылары биэрдилэр.
Үс нэһилиэк олохтоохторо СӨ Бырабыыталыстыбатын үлэтин биһирииллэрин биллэрдилэр.
Источник: «Сунтаар сонуннара» хаhыат.
-
0
-
0
-
0
-
0
-
0
-
0
