Тэрээһин Ил Түмэн наукаҕа, үөрэхтээһиҥҥэ, култуураҕа, информацияны киэҥник тарҕатар сириэстибэлэргэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Габышева салайыытынан барда. Сүбэ мунньахха министиэристибэлэр, улуустар, иһитиннэрэр-биллэрэр эйгэ, үөрэх бэрэстэбиитэллэрэ кыттыыны ыллылар.
Александр Жирков сийиэс быһаарыыта сахалыы тылбаастанан Саха Өрөспүүбүлүкэтин Бырабыыталыстыбатынан бигэргэммитин эттэ. Феодосия Габышева иһитиннэрбитинэн, кулун тутар 1 күнүгэр Ил Түмэн Бэрэссэдээтэлэ Алексей Еремеев Саха Өрөспүүбүлүкэтигэр саха тылын, литературатын уонна култууратын үөрэтии көрүгүн бигэргэтэргэ Саха Өрөспүүбүлүкэтин Бырабыыталыстыбатын Бэрэссэдээтэлэ Андрей Тарасенко аатыгар сурук суруйбута.
Саха Өрөспүүбүлүкэтин Билимҥэ уонна үөрэххэ миниистирэ Ирина Любимова Саха тылын, литературатын уонна култууратын учууталларын өрөспүүбүлүкэтээҕи II сийиэһин өрөсөлүүссүйэтин олоххо киллэрэр сүрүн тэрээһиннэр былааннарын билиһиннэрдэ. Ол курдук, былааҥҥа барыта 42 пуун киирбит. Олортон биирдэрэ хайдах туолан иһэрин, М.К. Аммосов аатынан ХИФУ РФ Хотугулуу-Илиҥҥи норуоттарын тылларын уонна култуураларын институтун дириэктэрэ Гаврил Торотоев иһитиннэрдэ. Кини саха тылын, литературатын уонна култууратын, Хотугу аҕыйах ахсааннаах төрүт омуктар тылларын учууталларын бэлэмнээһиҥҥэ миэстэ ахсаанын элбэтэргэ сакаас наадатын эттэ. Ол аата улуустар сакаастарынан көрөн туһааннаах хайысхаларга миэстэ ахсаанын хамнатан биэрэр кыах баар.
Ньурба улууһун үөрэҕин управлениетын начаалынньыгын солбуйааччыта Лена Котоконова улууска тыл сэбиэтэ тэриллибитин, итиэннэ Чаппанда оскуолатын түмэлин иһинэн тыл киинэ тэриллиэхтээҕин эттэ. Бу киин кэнсиэпсийэтэ оҥоһуллан оскуола салалтатынан бигэргэннэ.
«Саха» НКИХ» уонна «Мамонт» телеканаллар дириэксийэлэрин дириэктэрэ-сүрүн эрэдээктэрэ Олег Колесов саха кылаассык суруйааччыларын айымньыларыгар итиэннэ Хотугу норуоттар литератураларыгар тирэҕирэн ойуулуктары оҥоруу үлэтэ ыытыллыахтаах диэн эттэ. Бу үлэ «СӨ судаарыстыбаннай уонна официальнай тылларын харыстааһын уонна сайыннарыы» бырагырааматын чэрчитинэн барар. Быйыл бу бырайыактары олоххо киллэрэргэ 55 мөл. 100 тыһ. солк. көрүлүннэ.
Ил Түмэн Бэрэссэдээтэлин бастакы солбуйааччыта Александр Жирков түмүккэ үлэ сүрүн хайысхаларын ыйда:
- Саха тылын, литературатын уонна култууртаын учууталларын өрөспүүбүлүкэтээҕи II сийиэһин быһаарыытын үөрэх тэрилтэлэринэн тарҕатыллыахтаах;
-Оҕо уһуйааннарыгар оҕолор саха тылын баһылыылларыгар сөптөөх үлэ ыытыллыахтаах;
- Эбии үөрэхтээһин ыстандаардыгар улуустарынан көһө сылдьар мунньахтар тэриллиэхтээхтэр;
- Саха тылын учуобунньуктарын таҥан оҥорууга үлэ барыахтаах;
- Олоҥхо уонна саха кылаассыктарын айымньыларын сюжеттарыгар сөптөөх куукула оҥоруутугар өрөспүүбүлүкэтээҕи куонкурус ыытыллан, хас эмэ тыһыынчанан кэмпилиэк оҥоһуллан оҕо уһуйааннарынан тарҕатыллыахтаах;
- Саха тылын, литературатын уонна култууратын учууталларын өрөспүүбүлүкэтээҕи II сийиэһин өрөсөлүүссүйэтин олоххо киллэрии сүрүн тэрээһиннэрин былаана ситэриллэн бүтэһиктээх барыйаана кулун тутар 14 күнүгэр ырытыллыахтаах.
-
0
-
0
-
0
-
0
-
0
-
0
