Издательский дом Редакция Подписка
Погода в Якутске: . -16 oC

Ил Түмэн Ыччат, физическэй култуура уонна спорт дьыаларыгар кэмитиэтин бэрэссэдээтэлэ Михаил Гуляев алтынньы 25 күнүгэр Чурапчы уонна Мэҥэ Хаҥалас улуустарыгар гааһы киллэрии боппуруостарынан оробуочай мунньаҕы ыытта.

Ил Түмэн Ыччат, физическэй култуура уонна спорт дьыаларыгар кэмитиэтин бэрэссэдээтэлэ Михаил Гуляев алтынньы 25 күнүгэр Чурапчы уонна Мэҥэ Хаҥалас улуустарыгар гааһы киллэрии боппуруостарынан оробуочай мунньаҕы ыытта.

Мунньахха бу икки улууска гаас хаһаайыстыбата кыстыгы хайдах туруктаах көрсөн эрэрин итиэннэ чугастааҕы сылларга былааннанар үлэ-хамнас туһунан кэпсэтии таҕыста.

Тыа хаһаайыстыбатын миниистирин солбуйааччы Прокопий Николаев «Тыа сирин территорияларын 2020-2025 сс. кэлимник сайыннарыы» бырагырааматын чэрчитинэн, ааспыт икки сылга Чурапчы уонна Мэҥэ Хаҥалас улуустарыгар 10 эбийиэги, барыта 143 км усталаах гаас ситимин тардыы былааннамытын туһунан кэпсээтэ. Ити сыалга 677 мөл 997 тыһ. солк., ол иһигэр федеральнай бүддьүөттэн 620 мөл 376 тыһ., өрөспүүбүлүкэттэн 57 мөл солк.көрүллүбүт. Бэдэрээччик «Строй В» ХЭТ Чурапчы сэлиэнньэтигэр гааһы киллэриигэ сэттэ эбийиэк тутуутун саҕалаабыт. 2020 с. 95,8 мөл. солк., ол иһигэр федерацияттан 88,1 мөл., өрөспүүбүлүкэттэн 7,7 мөл. солк. көрүллүбүт. Тыа сирин гаастааһын бырагырааматын чэрчитинэн, быйыл үс эбийиэги тутуу саҕаламмыт. Кэлэр 2022-2023 сс. былааннанар 10 бырайыактан үһэ (Чурапчыга Үрүҥ Күөлгэ уонна Дириҥҥэ, Мэҥэ Хаҥаласка Бүтэйдээххэ гааһы киллэрии үлэтэ) бигэргэммит.

Бырамыысаланнас уонна геология миниистирин бастакы солбуйааччы Михаил Кириллин үлэ тэтимин харгыстыыр сүрүн кыһалҕа быһыытынан үбүлээһин ситэтэ суоҕа буоларын ыйда, ону инвестбырагыраамаҕа учуоттуурга эттэ.

Мунньах кыттыылаахтара гаас эбийиэктэрин бырайыактарын экспертизатын уонна сөбүлэһиитин тула санаа атастастылар. Чурапчы сэл. киин уулуссаларын территорияларыгар тутуллар сэттэ эбийиэккэ олорор сиэктэри холбооһуҥҥа иһитиннэриини Чурапчы улууһун баһылыгын э.т. Степан Саргыдаев оҥордо. Мэҥэ Хаҥалас улууһун баһылыгын солбуйааччы Георгий Куркутов, Хатылы (Чурапчы) баһылыгын солбуйааччы Афанасий Дьячковскай уо.д.а. бөһүөлэктэр истэринээҕи гаас утаҕын тардыы үлэтин хаамыытын, туох уустуктар баалларын сырдаттылар. Хадаар (Чурапчы) нэһилиэгин баһылыга Афанасий Степанов үһүс сылын бырагыраамаҕа кыайан киирбэккэ сылдьабыт, чугастааҕы нэһилиэктэрбит гааска холбоннулар диэтэ.

Чур_газ.jpg

Михаил Гуляев гаастааһын дойду үрдүнэн туруоруллар стратегическай сорук буоларын, бу үлэттэн нэһилиэнньэ олоҕун-дьаһаҕын таһыма тутулуктааҕын бэлиэтээтэ. Ааспыт ыйга Айсен Николаев нэһилиэнньэлээх пууннарга гааһы киллэрии социальнай хайысхатыгар анаммыт мунньаҕы ыыппытын кэпсээтэ.

– Бэрэсидьиэн Владимир Путин сорудаҕынан, дойдуга социальнай гаастааһын саҕаланна, – диэтэ кини. – Саха сиригэр нэһилиэнньэлээх пууннарга гааһы киллэрии ааспыт өттүгэр өрөспүүбүүкэ бэйэтин күүһүнэн ыытыллыбыт буолан, бу үлэ биһиэхэ кэккэ уратылардаах. Нэһилиэнньэлээх пууннарга гааһы киллэриини ситэрии өрөспүүбүлүкэтээҕи былаанынан, 82 нэһилиэнньэлээх пууҥҥа, 4 934 олорор дьиэҕэ (онно 11 500 киһи хабыллар) «күөх төлөн» киллэриллиэхтээх. Итинэн социальнай гаастааһыҥҥа 5,4 млрд солк суумалаах үлэ ыытыллыахтаах. Владимир Путин гааһы киллэриини түргэтэтиини уонна «күөх төлөн» нэһилиэнньэҕэ тииһилэҥнээх буолуутун хааччыйыыны эрэгийиэннэргэ чорботуллар сорук быһыытынан туруорда. Ону толорууга биһиги нэһилиэнньэ ноҕуруускатын аччатарга итиэннэ гааска холбонуу болдьоҕун түргэтэтэргэ көдьүүстээх ырычааҕы оҥоруохтаахпыт.

Мунньах түмүгэр бу нэдиэлэ бүтүүтүгэр бырамыысаланнас уонна геология миниистирин бастакы солбуйааччы Михаил Кириллиҥҥэ Тыа хаһаайыстыбатын министиэристибэтин, Чурапчы уонна Мэҥэ Хаҥалас улуустарын бэрэстэбиитэллэрэ кыттыылаах мунньах ыытыллара быһаарылынна диэн Ил Түмэн пресс-сулууспата иһитиннэрэр.

Хаартыскаҕа Василий Кононов (Ил Түмэн) түһэриитэ 

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением