Бу күннэргэ РЛДП баартыйа лиидэрэ Владимир Жириновскай ыган кэлбит экэнэмиичэскэй кириисискэ уонна коронавируһу суох оҥорор сыалтан-соруктан Арассыыйаҕа дьокутаат ахсаанын икки төгүл аччатар наадатын туһунан эттэ. Ити туһунан бэлиитик бэйэтин Twitter-гэр суруйда. Жириновскай маннык гынан бүддьүөт үбүн-харчытын кэмчилиэхпит диэн этэр. Маны таһынан бэлиитик быыбардааччылар учаастакка сэдэхтик мусталларын наадатыгар, быыбардары икки-үс сыл арыттаах ыытар наадатын туһунан бэлиэтиир. Кини өссө муус устарга дойду премьер-миниистирин Михаил Мишустины кытта көрсөрүгэр ити туһунан иһитиннэрэн турар. Кини бу көрсүһүүгэ: «Дойдуга чунуобунньук уонна дьокутаат икки төгүл аччаатаҕына, туох даҕаны уларыйыа суоҕа, үчүгэй эрэ буолуоҕа», - диэн Михаил Мишустиҥҥа эппит. Тустаах боппуруос болҕомтоҕо ылылларын, ылыллыбатын күн-дьыл көрдөрүөҕэ.
- 0
- 0
- 0
- 0
- 0
- 0