Араас тэрээһиннэр, аахсыйалар, кэнсиэрдэр нэдиэлэ инниттэн буолан саҕалаабыттара.
Ил Түмэн дьокутааттара Ил Дархан Айсен Николаевы, бырабыыталыстыба чилиэннэрин кытары "Кыайыы буойуннара" монумеҥҥа уонна Үйэлээх уокка сибэкки дьөрбөтүн уурар тэрээһиҥҥэ кытыннылар.Кинилэр Триумфальнай ааркаттан "Кыайыы буойуннара" монумеҥҥа диэри хааман бардылар.
Кыайыы болуоссатыгар сибэкки дьөрбөтүн уурууга Ил Дархан Айсен Николаев, СӨ маҥнайгы бэрэсидьиэнэ Михаил Николаев, Ил Түмэн бэрэссэдээтэлин маҥнайгы солбуйааччы Александр Жирков, тыыл, үлэ бэтэрээннэрэ Галина Наумова уонна Юлия Кондратьева, тыыл бэтэрээнэ, Саха Сирин бэтэрээннэрин Сэбиэтин бочуоттаах бэрэссэдээтэлэ Будимир Слепцов, СӨ сүрүн федеральнай инспектора Евгений Корнеев, СӨ Үрдүкү суутун бэрэссэдээтэлэ Любовь Летучих, Россия куттала суох буолуутун федеральнай сулууспатын Саха Сиринээҕи Управлениетын начаалынньыга Сергей Бобровников, СӨ Ис дьыалаҕа миниистирэ Владимир Прокопенко, СӨ Росгвардия управлениетын начаалынньыга Сергей Челищев, МЧС сүрүн управлениетын начаалынньыга Павел Гарин, СӨ борокуруорун э.т. Сергей Губин, СӨ Юстицияҕа министиэристибэтин управлениетын салайааччы Александр Бурханов, СӨ суут приставтарын федеральнай сулууспатын Управлениетын салайааччытын э.т., сүрүн суут пристава Александр Рогалев, СӨ накаастабылы толорооччу федеральнай сулууспатын Управлениетын начаалынньыга Василий Седрисев, Дьокуускай уонна Ленскэй Архиепискоба Владыка Роман кыттыыны ыллылар.
Маны тэҥэ тыыл бэтэрээннэрэ, байыаннай дьайыылар бэтэрээннэрэ, Дьокуускай куорат Дууматын дьокутааттара, политическай диэйэтэллэр, Бочуоттаах гражданиннар, уопсастыбаннай тэрилтэлэр, үөрэнээччилэр, куорат ыччата сүгүрүйүү түгэнигэр кыттыстылар.
Тэрээһин Аҕа дойду Улуу сэриитигэр сырдык тыыннарын толук биэрбит буойуннары кэриэстээн, чуумпуран турууттан саҕаланна. Концлагерьга быстыбаттары, сураҕа суох сүппүттэри, Улуу Кыайыыга диэри тыыннаах тиийбэтэхтэри санаатылар...
Ил Дархан эҕэрдэ тылыгар норуот сомоҕолоһуута ордук күүскэ бу күннэргэ күүһүрүөн наадатын эттэ. Саха Сириттэнн фроҥҥа 63 тыһыынча киһи ыҥырыллыбыта, 38 тыһыынчаттан тахсата олохторун толук уурбуттара.
«Бүгүн биһиги кэккэбитигэр Саха Сирин үрдүнэн 28 фронтовик хаалла. Хас биирдиилэрэ -- дьоруой, тыыннаах номох. Кыайыыны фроҥҥа эрэ буолбакка, тыылга эмиэ уһансыбыттара. Бүгүн биһигини кытары 2665 тыыл бэтэрээнэ олорор, кинилэр дойдуга таптал уонна бигэ буолууга холобурдар», – диэн эттэ Айсен Николаев.
-
2
-
0
-
0
-
0
-
0
-
0
