12 №-дээх биир мандааттаах Өлүөхүмэтээҕи быыбардыыр уокурукка «Биир ньыгыл Арассыыйа» политическай баартыйа эрэгийиэннээҕи салаатыттан норуот дьокутаата Арсентий Николаев 2021 сыл сэтинньи 10 күнүгэр олохтон туораабытынан, норуот дьокутаатын быһыытынан боломуочуйата болдьоҕун иннинэ тохтотулунна.
Хотугу төрүт олохтоох, аҕыйах ахсааннаах омуктар уонна Арктика дьыалаларыгар кэмитиэт бэрэссэдээтэлэ Елена Голомарева Арсентий Прокопьевич олорон ааспыт олоҕо гражданскай иэһи төлөөһүн, бэйэ дойдутугар, норуотугар, уопсастыбаннай үлэҕэ бэриниилээх буолуу дьоһун холобура буоларын, кини көҕүлээһинэн «Табаны иитии туһунан» федеральнай сокуон оҥоһуллубутун бэлиэтээтэ. «Тээнэ» аҕа ууһун общинатын салайааччы, Саха сирин Табаһытттарын ассоциацияларын бэрэсидьиэнэ, норуот хаһаайыстыбатын үтүөлээх үлэһитэ Арсентий Николаев сырдык кэриэһигэр биир идэлээхтэрэ мүнүүтэ устатыгар саҥата суох сөҥөн турдулар.
Нерюнгри эрэгийиэннээҕи бөлөххө «Арассыыйа либеральнай-демократическай баартыйата – ЛДПР» политичексай баартыйаттан норуот дьокутаата Евгений Перфильев өрөспүүбүлүкэ Экологияҕа, айылҕаны туһаныыга уонна ойуур хаһаайыстыбатыгар миниистирин эбээһинэһин толорооччунан анаммытынан, норуот дьокутаатын быһыытынан боломуочуйата болдьоҕун иннинэ тохтотулунна. Пленарнай мунньаҕы салайан ыыппыт бастакы вице-спикер Александр Жирков дьокутааттар ааттарыттан Евгений Перфильев парламеҥҥа үлэтин үрдүктүк сыаналаата, киниэхэ саҥа үлэтигэр ситиһиилэри баҕарда.
- 0
- 0
- 0
- 0
- 0
- 0