Михаил Гуляев улуус Сэбиэтин дьокутааттарыгар Ил Түмэн ыытар үлэтин, саҥа сокуоннар ылыллыбыттарын туһунан сиһилии ырытан кэпсээтэ. Норуоту аймаабыт бэйдиэ сылдьар ыттар туһуламмыт «Кыылларга эппиэтинэстээх сыһыан туһунан» федеральнай сокуоҥҥа парламент киллэрбит кэккэ этиилэрин, бу эйгэҕэ үлэни Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин сүрүннээн ыытарын кэпсээтэ.
Улуус дьокутааттара «Аһаҕас былаас тиһигэр олохтоох бэйэни салайыныы биир кэлим бириинсиптэрин олохтуур туһунан» сокуон барылын туоһуластылар. Ааспыт сыл ахсынньытыттан саҕалаан федеральнай сокуон барыла өрөспүүбүлүкэҕэ дьүүллэһиллибитин, сокуону оҥорор уонна толоруулаах былаас уорганнарын, улуустар бэрэстэбиитэллэрэ, нэһилиэк баһылыктара, дьокутааттара, нэһилиэнньэ бары араҥата көхтөөхтүк кыттыбытын, Ил Түмэн судаарыстыбаннай тутулга уонна олохтоох салайыныыга сис кэмитиэт бэрэссэдээтэлэ Владимир Прокопьев ыытыллар үлэни сүрүннээн салайарын сырдатта.
«Сокуон барыла тохсунньу 17 күнүгэр Ил Түмэн отут үһүс (уочарата суох) пленарнай мунньахха бастакы ааҕыыга көрүллүбүтэ. Олунньу 15 күнүгэр иккис ааҕыыта көрүлүннэ. Дьүүллэһии түмүктэринэн киирбит сокуон барылыгар 150 этиини уонна 50 көннөрүүнү, парламент спикерэ Алексей Еремеев дьаһалынан тэриллибит оробуочай бөлөҕөр көрүлүннэ. Саамай сүрүн суолталаах, өрөспүүбүлүкэ интэриэһин көмүскүүргэ, араҥаччылыырга, уратытын учуоттуурга, олохтоох салайыныы тиһигэр эрэгийиэннэр бырааптарын, итиэннэ боломуочуйаларын кэҥэтэргэ туһаайыллыбыт сокуон барылыгар этиилэр сүүмэрдэнэн, чуолкайданан, иккис ааҕыытыгар уон этии киирбитэ. Саҥа федеральнай сокуон субъектарынан үгүс быраабы олохтуур, боломуочуйаны биэрэр. Сокуон барыла Госдумаҕа ылылыннаҕына, федеральнай сокуоҥҥа сөп бүтэһиннэрэн өрөспүүбүлүкэтээҕи сокуон оҥоһуллуоҕа, муниципалитеттар устааптарыгар уларытыылар киириэхтэрэ», - диэн норуот дьокутаата Михаил Гуляев кэпсиир. Итини сэргэ улуус дьокутааттара биэнсийэ ааҕыллыытыгар саҥа киирбит уларытыылары, бултуур сир, успуорт эйгэтин сыһыаннаах ыйытыктары биэрдилэр.
Михаил Дмитриевичкэ Чурапчы улууһун дьокутааттарын Сэбиэтин бэрэссэдээтэлэ Афанасий Захаров махтанна, инникитин да өссө маннык көрсүһүүлэр ыытыллаллара наадатын туһаайда. Хас биирдии дьокутаат саҥа ылыллар сокуоннары үөрэтэн, быыбардааччыларга сырдатыах тустаахтарын бэлиэтээтэ.
Светлана Диодорова
-
0
-
0
-
0
-
0
-
0
-
0
