Издательский дом Редакция Подписка
Погода в Якутске: . -14 oC

Сахалыы сувенирдары оҥорор мастарыскыайдаах Сардаана Николаевна Олесова харысхал оҥорор хоббитын хайдах дохуот аҕалар дьыалаҕа кубулуппутун туһунан кэпсээтэ.

Сахалыы сувенирдары оҥорор мастарыскыайдаах Сардаана Николаевна Олесова харысхал оҥорор хоббитын хайдах дохуот аҕалар дьыалаҕа кубулуппутун туһунан кэпсээтэ.

Олесовтар урбаан эйгэтигэр бастакы хардыыларын 10-тан тахса сыллааҕыта оҥорбуттар. Улуустарга таһаҕас тиэйэр тэрилтэлээхтэр эбит.

-- Оттон мин өйдөбүнньүк бэлэхтэри, харысхаллары, дэйбиирдэри оҥорорбун сөбүлүүбүн. Кэргэним Иннокентий Семенович эмиэ бэйэм курдук, тугу да оҥорботоҕуна, илиитэ «кыһыйар». Ол иһин ылсан дьарыктаныахха диэн, оскуолаҕа уруһуй учууталынан үлэлии сылдьан уурайан, 2018 сыллаахха ИП быһыытынан регистрацияланан, үлэбитин саҕалаабыппыт.

Төрүт сахалыы уһаныы албастарын уонна матырыйаалларын туһанабыт. Кэргэним тириини талкынан имитэр, дэйбиир тутааҕын удьурхайтан кыһар, мин барытын таҥабын, силимниибин, киэргэтэбин, -- диэн Сардаана Николаевна кэпсиир.

Олесовтар сахалыы ойуулаах-мандардаах паннолары, көбүөрдэри, харысхаллары, дэйбиирдэри, сувенирдары мастан, туостан оҥороллор эбит.

Сардана Олесова 2

Оҥоһуктарынан өрөспүүбүлүкэҕэ буолар норуот маастардарын быыстапкаларыгар көхтөөхтүк кытталлар. СӨ урбаанньыттарын «Саха Сиригэр оҥоһуллубут» ассоциацията бэлиэтии көрөн, Сардаана Николаевнаны бэйэлэрин кэккэлэригэр киллэрбиттэр.

--Ассациация араас маастар-кылаастары, таһымы үрдэтэр куурустары тэрийэрэ олус туһалаах. Аны туран, оҥоһуктарбар сэртипикээт ыларбар босхо көмөлөстө. Бу биһиэхэ олус баҕалаах докумуоммут буолар. Табаарбыт  хаачыстыбалааҕын туоһулуур.

Миэхэ кинилэр эппиттэрэ: “Өрөспүүбүлүкэ урбааҥҥа министиэристибэтин иһинэн үлэлиир «Мин биисинэһим» кииҥҥэ бара сырыт, онно көмө оҥорор кэккэ бырагыраамалаахтар”, -- диэн. Ол курдук, бастаан консультация ылбытым, онтон куонкуруска кыттынным.

Олесовтар тэрилтэлэрэ аата, тус бэлиэтэ, социальнай ситимҥэ страницата суох эбит. Этэргэ дылы, кыһыл тылларынан эрэ кэпсии сылдьыбыттар. Дьон «этэрбэс араадьыйатын» истэн, атыылыһа кэлэр эбит. «Мин биисинэһим» кииҥҥэ оруобуна кини ирдэбилигэр сөптөөх көмө миэрэтэ баарыттан олус үөрбүт. Ол курдук, брендбук, тус бэлиэлээх бакыат, логотиптаах суулар-хаалар уонна социальнай ситиминэн тарҕанар рекламаны оҥорторбуттар. Оннук эрэ гыннахтарына, дьон-сэргэ билэн, атыыларын-эргиэннэрин кэҥэтиэхтэрин, киэҥ эйгэҕэ тахсыахтарын сөп.
Сардана Олесова 4

--Бастаан атын урбаанньыттары кытары билсиһии буоларыгар, мин эрэ тэрилтэм аата суох курдуга. Бары наһаа үчүгэйдик биисинэстэрин билиһиннэрэллэрэ, ааттара олус дорҕоонноохтук иһиллэрэ. Мин буоллаҕына: “ИП Олесова”, -- диирим. Онтум үчүгэйдик өйдөммөтө чуолкай.

Ааппытын олус өр толкуйдаабыппыт. Уус-уран оҥоһуктарга сыһыаннаах аат барыта ылыллыбыт, туһаныллыбыт, баранан хаалбыт курдук этэ. Онтон «Суол-Иис» диэҥҥэ тохтообуппут. Сүрэхпит сылааһын ууран туран оҥорбут сувенирбыт хас биирдии атыыласпыт киһини сырдыкка, кэрэҕэ сирдиир суол буоллун диэн. Логотиппыт -- силиһэ иннэ ойуулаах сардаан сибэкки. Ааттанан-суолланан, дьыалабыт чуолкай омооннонно.

Сардана Олесова3

Олесовтар уус-уран оҥоһуктара улахан таһымнаах куонкурустарга кыайбыта кэрэхсэбиллээх. Хабаровскайга Приамурскай быыстапка-дьаарбаҥкаҕа ситиһиилээхтик кыттан, сэртипикээт ылбыт. 2020 сыллаахха «Кыһын Саха Сириттэн саҕаланар» бэстибээл чэрчитинэн буолбут «Саха Сирин бастыҥ туристическай сувенира» диэн куонкуруска кыайбыттар. Маны таһынан өрөспүүбүлүкэ таһымнаах быыстапкаларга кыттыбыттарын туоһулуур наҕараада суруктар үгүстэр.

Сардаана Николаевна быыстапка кэмигэр сувенирдары оҥорууга үөрэтэр маастар-кылаастары ыытар. Ону таһынан Олесовтар, төһө да биисинэстэрэ саҥа атаҕар туран эрэр буоллар, кырдьаҕастарга, элбэх оҕолоохторго, устудьуоннарга спонсор быһыытынан көмөлөһөллөрүн хайгыы иһиттим.

Бэйэ дьыалатынан саҥа дьарыктанан эрэ дьоҥҥо Сардаана Николаевна сүбэлиир:

--Бэйэҕит искитигэр бүгэн баран сылдьымаҥ, атын урбаанньыттары кытта билсэн иһиҥ. Ону таһынан “Мин биисинэһим” кииҥҥэ сылдьан, сүбэ-ама ылыҥ. Кинилэр кэлбит киһиэхэ барытыгар көмөлөһө сатыыллар. Бастаан сүбэлииллэр, ол кэннэ бэйэҥ быһаараҕын хайдах салгыы үлэлииргин. Мин 2018 сылга ИП буолан баран, “Мин биисинэһим” кииҥҥэ бара сылдьыахпын баҕарбытым эрээри, эдэрдэргэ эрэ көмөлөһөллөрө буолуо дии санаан туттуммутум. Онтум баара аана барыларыгар аһаҕас эбит.

Манна даҕатан эттэххэ, урбаанньыттарга көмө миэрэлэрин туһунан сиһилии иһитиннэриини call-киин 8-800-100-58-80 нүөмэригэр эрийэн билсиҥ. СӨ дьоҕус уонна орто урбааннарын порталыгар баар «Быһа ситим» сервис нөҥүө эмиэ көмөнү ылыаххытын сөп.

Сардаана Кузьмина.

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением