Сокуон бырайыагар 2021 сылга өрөспүүбүлүкэ дохуоттаах чааһа 197 млрд. 576 солк., 2022 сылга 219 млрд. 132 мөл. солк, 2023 сылга 183 млрд. 223 мөл. солк., оттон ороскуоттаах чааһа 2021 сылга 198 млрд 574 мөл. солк. 2022 сылга 220 млрд. 131 мөл.солк уонна 2023 сылга 184 млрд. 221 мөл. солк. тэҥнэһэр. Оттон дэпэссиит үс сылга 998,8 мөл. солк. тиийэрэ сабаҕаланар. Валерий Жондоров быһаарбытынан, 2021 сылга өрөспүүбүлүкэ бүддьүөтүн дохуоттаах чааһа 1 млрд. 650 мөл. солк. үрдүөхтээх. Бу үрдээһин «СӨ 2021-2024 сс. социальнай-экэнэмиичэскэй сайдыытын прогноһун туһунан” өрөспүүбүлүкэ Бырабыыталастыбатын дьаһалыгар көннөрүү, итини тэҥэ, РФ Бүддьүөтүн кодексатыгар уларытыылар киирбиттэрин кытта сибээстээх. Мунньахха дьүүллэһии кэнниттэн ити 1 млрд. 650 мөл. солк. тыа хаһаайыстыбатыгар оҥорон таһаарыыны өйүүргэ туһанарга быһаардылар.
«Олохтоох тыа хаһаайыстыбатын оҥорон таһарыытын сайыннарыыга уонна олохтоох бородууксуйаны элбэтиигэ, итини тэҥэ, Ил Дархан Айсен Николаев Анал этиитэ олоххо киирэригэр судаарыстыбаннай көмө саҥа миэрэтэ баар буолуохтаах», – диэн СӨ Бырабыыталастыбатын Бэрэссэдээтэлин э.т. Андрей Тарасенко диэн ылыныллыбыт быһаарыыга санаатын эттэ. Бу соругу олоххо киллэрэргэ эбии 3 млрд. 350 мөл. солк. көрүллүөҕэ. Үп миниистирэ Валерий Жондоров быһаарбытынан, өрөспүүбүлүкэ инвестицияҕа бырагырааматын чэрчитинэн, 2021 сылга 60 эбийиэк тутуллуохтаах, саҥардыллыахтаах. Итинтэн 39-һа ситэриллэр эбийиэк, 21-рэ саҥа тутуллар.
- 0
- 0
- 0
- 0
- 0
- 0