Экэниэмикэ

Хас биирдии киһи аһыгар туһанар моркуобун, луугун, сүбүөкүлэтин, хаппыыстатын уонна хортуоппуйун сыаната соторутааҕыта үүнэ-тэһиинэ суох үрдүк этэ. Бүрүүкээбит балаһыанньаны көннөрөөрү, ааспыт нэдиэлэҕэ дойду Бэрэсидьиэ­нэ Владимир Путин бу тахсыбыт айбардааһыны быһаарарга уонна ону сааһылаан былаанын оҥорорго соруйда. Онуоха «Биир ньыгыл Арассыыйа» баартыйата бу боппуруоһунан үлэтин тута саҕалаан, сорох этиилэрэ хайыы-үйэ үлэҕэ киирдилэр.

«Бастакынан, үүнүүнү хомуйуу кэмигэр оҕуруот аһынан дьарыктанар оҥорон таһаарааччылар бородууксайаларын тыа хаһаайыстыбатын ырыы­нагар тута тиэрдиини хааччыйыахха. Мантан сиэт­тэрэн, нэһилиэнньэҕэ быһаччы атыылыырдыы, миэстэтигэр дьаарбаҥкалары тэрийиэххэ. Итини таһынан сыананы эбэн тиэрдээччи тэрилтэлэр үлэлэрин тохтотору ситиһиэххэ. Иккиһинэн, эрэгийиэннэринэн сыананы үрдэтэн атыылыылларын бобуохха. Сорох сирдэргэ табаар сыанатын 200 %-ҥа диэри үрдэтэллэрин билэбит. Биллэн турар, бу сиэрэ суох быһыы», — диэтэ вице-премьер Алексей Гордеев.

 Билигин оҕуруот аһын сыаната улахан кэтэбилгэ-манабылга киирдэ. Волонтердар ырыынактарынан сылдьан, нэдиэлэҕэ тыһыынчаттан тахса рейдэни оҥордулар. Бу күннэргэ итинник бэрэбиэр­кэни Новосибирскайга бүтүн Арассыыйатааҕы норуот фрона уонна «Биир ньыгыл Арассыыйа» актыбыыстара тэрийэн ыыттылар. Атын табаар сыанатыгар болҕомтону эмиэ уурдулар. Үгүс дьон ас-үөл сыаната кэлиҥҥи кэмҥэ олус үрдээбитин туһунан Бэрэсидьиэҥҥэ быһа эпииригэр эрийэн эппиттэрэ.

–Оҕуруот аһыгар, фруктаҕа Аартыкаҕа «космическай» сыана эбээт. Оннооҕор Дьокуускайга сыананы иккилии, сорохторго үстүү төгүл үрдэттилэр. Бу боппуруос хаһан быһаарылларый? Хас биирдии оройуоҥҥа өрөспүүбүлүкэ бүддьүөтүттэн сыананы оҥорор, кэтиир тустаах үлэһиттэр бааллар.

Аартыканы сайыннарыыга уонна хоту дойду норуоттарын дьыалаларыгар министиэрис­тибэтэ ханнаный? Саха Өрөспүүбүлүкэтин сыанаҕа бэлиитикэтин судаарыстыбаннай кэмитиэтэ тугу көрөр? Тугунан дьарыктаналларый? Аартыка оройуоннарыгар хамнас төлөбүрэ киин оройуоннартан туох да улахан уратыта, үрдүгэ суох. Оттон нэһилиэнньэ олоҕун усулуобуйата ас-үөл сыанатыттан да көрдөххө – ыарахан, уустук. «Оҕолорго хаһан эмэ устууканан атыылаһабыт», – диэн төрөппүттэр барахсаттар суруйаллар. «Күөх рейстэр» кыһыҥҥы кэмҥэ былааннаналлар, оттон сайын? Аартыка улуустарыгар таһаҕас тиэйии боппуруоһун федеральнай таһымҥа быһаарыыны күүтэбит, – норуодунай дьокутаат, Ил Түмэн аҕыйах ахсааннаах төрүт норуоттарын уонна Аартыка дьыалаларыгар сис кэмитиэтин бэрэссэдээтэлэ, «Биир ньыгыл Арассыыйа» баартыйа чилиэнэ, хоту дойду дьонун туһугар ис сүрэҕиттэн кыһаллар Елена Голомарева санаатын үллэһиннэ.