Ойуур питомнигар Саха сиригэр үүнэр маһы барытын үүннэриэхтэрэ. Санатан эттэххэ, 2019 сыл тохсунньу 1 күнүттэн сир баайын хостооччулар, ойууру туһанааччылар, геологоразведканы ыытааччылар, линейнай эбийиэктэри тутааччылар, саҥа федеральнай сокуонунан, кэрдибит ойуурдарын оннугар саҥа маһы, ойууру олордор эбээһинэстээхтэр.
Саҥа бырайыагы Арктикатааҕы судаарыстыбаннай агротехнологическай университет, СӨ Экологияҕа, ойууру туһаныыга уонна ойуур хаһаайыстыбатын министиэристибэтэ, Өлүөхүмэ улууһун дьаһалтата кыттыһан олоххо киллэрэллэр.
Солянкаҕа мастары аһаҕас уонна сабыылаах буорга олордон үүннэриэхтэрэ. Питомник уопсай иэнэ – 4,2 гектар. Оҥорон таһаарар кыамтата – сылга аһаҕас халлаан анныгар 3 мөлүйүөн мас уонна сабыылаах тутууга – 140 тыһыынча мас. Итиннэ сүрүннээн тиит уонна бэс мастары олордуохтара.
Бырайыагынан чөлүгэр түһэриллэр ойуур кээмэйэ кэрдиллибит ойуур кээмэйигэр тэҥнэһиэхтээх. Саҥа ойууру олордуу үлэтэ урукку ойуур кэрдиллибитин биир сыл ааспытын кэннэ саҕаланыахтаах. Маһы үүннэрии ороскуотун бүтүннүү ойууру туһанааччылар толуйуохтаахтар. Ханнык сиргэ саҥа мас олордулларын анал реестртан көрөн олордуохтара.
“Өлүөхүмэ” хаһыатын матырыйаалынан.
-
0
-
0
-
0
-
0
-
0
-
0
