Ол курдук, эрэгийиэннээҕи ойуур хаһаайыстыбатын диспетчерскэй сулууспата иһитиннэрбитинэн, өрөспүүбүлүкэ үрдүнэн Горнай, Томпо улуустарыгар уонна Дьокуускай куоракка буруо баар. Бу үс ойуур баһаара хонтуруолга ылыллыбыттар. Уоннааҕылар ыраах буолан, нэһилиэнньэлээх пууннарга кутталы үөскэппэттэрэ биллэр. Роспотребнадзор пресс-сулууспата иһитиннэрбитинэн, Дьокуускай куоракка буруоттан салгын киртийиитэ нуорманы таһынан барбыт. Ол курдук, салгыҥҥа 2,5 фракцияҕа (РМ) 0,16 мг/м3 нуорма быһыытынан ылыллар буоллаҕына, бу сарсыардааҥҥы туругунан, ити 0,3 мг/м3 тэҥнэспит. Бу буруо Нам уонна Горнай улуустарыгар баар ойуур баһаардарыттан лаппа биллэрдик кэлэр. Тустаах исписэлиистэр Дьокуускай куорат олохтоохторугар кыра наада аайы таһырдьа күүлэйдии, дьаарбайа тахсыбаттарыгар сүбэлииллэр уонна, төһө кыалларынан, дьиэ түннүгүн мээнэ аспаттарыгар этэллэр. Ордук саастаах дьон таһырдьа быкпаттара ордугун бэлиэтииллэр.
СӨ Экологияҕа министиэристибэтин пресс-сулууспата иһитиннэрбитинэн, ойуур баһаарын туруутугар үксүгэр нэһилиэнньэ бэйэтэ буруйдаах. Ол курдук, отунньуттар, кусчуттар, улахан булка сылдьар булчуттар уоту сэрэҕэ суохтук туһаналларыттан үксүгэр ойуур баһаара буолар эбит. Онон тустаах министиэристибэ ойуурга сылдьаргытыгар уоту сэрэхтээхтик туһанаргытыгар сүбэлииллэр.
Хаартыскалар: Интэриниэттэн.
-
0
-
0
-
0
-
0
-
0
-
0
