Үүт тутааччынан сайыҥҥы кэмҥэ тыа хаһаайыстыбатын исписэлииһэ Прасковья Данилова үлэлиир. Прасковья Иннокентьевна Мээндигигэ 1986 сылтан олохсуйан олорор, Мээндиги төрүт олохтооҕо да диэххэ сөп. Кини бэйэтэ идэтинэн ветеринар-быраас.
„Биһиги нэһилиэккэ Т.И. Яковлева салайааччылаах “Сайдам”, А.Я.Егоров салайааччылаах “Аргыс” бааһынай хаһаайыстыбалара уонна аҕыс чааһынай ынахтаах ыал сарсыарда эрдэттэн үлэлээн-хамсаан үүттэрин туттаран, былааны толорон иһэллэр. Ол курдук “Аргыс” БФХ салайааччыта эдэр киһи Айхал Ярославович Егоров биһиэхэ элбэх үүтү туттарааччылартан биирдэстэрэ. Дьиэ кэргэнинээн көмөлөөн үлэлииллэр. Аҕата Ярослав Викторович үүт таһарыгар көмөлөһөр. Сайын саамай өлгөмө 10 ынаҕыттан 100-тэн тахса киилэ үүтү туттарар.
Сүрүн тирэх биһиги нэһилиэккэ – чааһынайдар. Бир бастыҥ ыанньыксыт Дмитрий Иванович Адамов сотору сайылыктан кэлиэхтээх. Кини “Оһохтоох” диэн сайылыкка олорор эрээри, Мээндиги нэһилиэгэр баар. Ыйга 8 т үүт туттарар, онон былааны эмиэ толорсор. Үүттэрин хаачыстыбата үчүгэй. Уон хоно-хоно маститка, ыйга биирдэ ветеринарнай лабораторияҕа үүт хаачыстыбата бэрэбиэркэлэнэр. Хас биирдии киһи элбэх үүтү ыырга уонна үрдүк сыалаах үүтү туттарарга интэриэстээх. Үүт төһө сыалааҕын, хойуутун ыйга иккитэ көрөллөр. Күһүн буолан үүт сыата син үрдүк, 4 сыалайга тэҥ. Үүт тиэйэр массыына хойутаабакка кэлэр. Инньэ гынан үүт туттарааччылар үлэлэригэр-хамнастарыгар, оттуулларыгар мэһэйдэппэттэр, үөрэллэр.
“Амма” ТХППК-гар, чуолаан суоппар Спиридон Корниловка махтаналлар. Билигин 1 киилэ үүтү 35 солк., онно субсидия ааҕыллан 45 солк. тутабыт. Чааһынайдар, холобура, биир ынахтан 10-15 киилэ үүт туттаран, ортотунан ыйга 16 тыһ. солк. хамнастаналлар. Онон кыра да буоллар, дохуот оҥостоллор. Кэлэр өттүгэр чааһынай үүт туттарааччылары, кэтэх хаһаайыстыбалаах ыаллары өрөспүүбүлүкэ, Бырабыыталыстыба, оройуон салалталара өйүүллэрэ наада. Билигин биһиги чааһынайдар үүт туттараннар былааммытын толорон олоробут. Эһиил балаһыанньа хайдах буолара биллибэт. Биирдии ынахха 35000 солк. көрөн баран, чааһынайдартан үүт тутумаары гыналлар. Оччоҕуна аҥардас сүөһү көрөн олохторун хааччынан олорооччуларга уустуктардаах буолара чуолкай”, – диэн Прасковья Иннокентьевна санаатын үллэстэр.
«Амма олоҕо» хаһыат
-
0
-
0
-
0
-
0
-
0
-
0
