Мунньахха СӨ Бырабыыталыстыбатын Бэрэссэдээтэлин солбуйааччы Михаил Никифоров, СӨ Тыатын хаһаайыстыбатын миниистирэ Александр Атласов, СӨ баайга-дуолга, сир сыһыаннаһыытыгар миниистири солбуйааччы Ньургустаана Пахомова, уо.да.а. кытыннылар.
Тыа хаһаайыстыбатын миниистирэ Александр Атласов 2021 сылтан тыа хаһаайыстыбатынан дьарыктанар тэрилтэлэргэ, бааһынай хаһаайыстыбаларга барыларыгар ыанар ынахтарын аайы 35 тыһ. солк. бэриллэрин уонна итини тэҥэ, Саха сирин бары улуустарыгар бэйэ хаһаайыстыбалаах биирдиилээн дьон, ыал субсидияҕа хапсыахтарын сөбүн туһунан иһитиннэрдэ. Бу иннинэ итинник хабааннаах субсидияны Аартыка улуустара эрэ ылаллара.
Ол эрээри, барыта сытыы быһах арыыга судургутук киирэрин курдук буолбатах. 2000 сыллаахха тахсыбыт «О личном подсобном хозяйства граждан в Республике Саха (Якутия)» диэн сокуон ирдэбилинэн, бэйэ хаһаайыстыбатын тэриниигэ 2,5 гектардаах сир баар буолуохтаах. Тыа хаһаайыстыбатын миниистирэ Александр Атласов быһаарбытынан үөһэ этиллибит судаарыстыбаннай өйөбүлү ылыыга ити ирдэбил, нуорма аны туһаныллыбат буолбут. Тыа хаһаайыстыбатын министиэристибэтэ норуот дьокутааттара «О личном подсобном хозяйства граждан в Республике Саха (Якутия)» сокуоҥҥа уларытыыны киллэрэн, бэйэ хаһаайыстыбатын тэриниигэ сирдээх буолуу ирдэбилин суох гынар туһунан этиилэрин өйөөбүт. СӨ Баайга-дуолга уонна сир сыһыаннаһыыларыгар миниистири солбуйааччы Ньургустаана Пахомова тустаах өрөспүүбүлүкэтээҕи сокуоҥҥа киириэхтээх уларытыыларга санаатын эттэ. Кини быһаарбытынан «О личном подсобном хозяйстве» диэн РФ сокуонугар бэйэ хаһаайыстыбатынан дьарыктанааччыларга бачча сир, учаастак көрүллэр диэн ыйыллыбат эбит. Итини тэҥэ, өрөспүүбүлүкэтээҕи тустаах сокуоҥҥа «полевой земельный участок используется исключительно для производства сельскохозяйственной продукции без права возведения на нем зданий и сооружений и включает в себя земельный участок, отведенный под сенокосные, пахотные и прочие угодья» диэн ыйылла сылдьара, төттөрүтүн, федеральнай сокуон нуорматын кэҥэтэн биэрэр диэн миниистири солбуйааччы быһаарда. Кини этэринэн, сорох дьон оттуур ходуһаны бас билэр сири, учаастакка тэҥнээн сыыһа өйдүүллэр эбит. Манна биири өйдүөххэ наада. Оттонуллар ходуһа сирэ чааһынай бас билиигэ бэриллибэт. Кэлиҥҥи кэмҥэ бэйэ хаһаайыстыбатын тэриниигэ (ЛПХ) туһаныллар учаастак ахсаана лаппа элбээн эрэрэ биллэр.
Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин дьон ыанар ынахтарыгар ылбыт субсидияны хайдах отчуоттуулларын туһунан ыйыталаста. Миниистир Александр Атласов билиҥҥи туругунан субсидия мэхэньиисимин быһаарарга аналлаах бырабыыталыстыба дьаһала тахсыахтаах. Онно этиллэринэн, субсидия үбэ ороскуоту толуйууга туһаныллыахтаах. Онуоха бэйэ хаһаайыстыбалаах дьон сыл бүтүөр диэри сүөһүлэрин ахсаанын биири даҕаны аҕыйатыа суохтаахтар. Өскөтүн, сүөһү ахсаана аҕыйаабыт буоллаҕына, субсидияны төннөрүөхтээхтэр. Норуот дьокутаата Мария Христофорова муниципалитеттарга үлэлиир анал боломуочуйалаах киһи сүөһү ахсаанын дааннайын биэриэхтээҕин этэн туран, кэлиҥҥи кэмҥэ үгүс нэһилиэктэргэ хаһаайыстыбаннай кинигэ чуолкайдык толоруллубатын туһунан ыйда уонна ити үлэ ыытыллыыта нэһилиэк дьаһалтатын исписэлииһин таһымыттан улахан тутулуктааҕын санатта.
Тустаах кэмитиэт бэрэссэдээтэлэ Андрей Находкин ити сытыы боппуруоска СӨ ситэриилээх былааһын кытта сөптөөх үлэ, кэпсэтии ыытылларын этэн туран, «Биһиги тыа сирин дьонугар олус наадалаах боппуруоска сөптөөх туочуканы туруордубут. Бастакытынан, ирдэниллэр 2,5 гектар сир бэйэ хаһаайыстыбалаах дьон субсидияны ылалларыгар мэһэйдиэ суоҕа. Иккиһинэн, ыанар ынах иһин бэриллибит үп отчуоттаныллыа суоҕа», -- диэн мунньаҕы түмүктүүр тылыгар эттэ.
Ил Түмэн пресс-сулууспата.
-
0
-
0
-
0
-
0
-
0
-
0
