Ахсынньы 14 күнүттэн ахсынньы 18 күнүгэр диэри Саха тыйаатырын труппата 117-с тыйаатыр сезонун бастың туруорууларын кѳрдѳрдѳ. Ол курдук, Н. Якутскай «Тѳлкѳ», И.Гоголев-Кындыл «Дыгын Дархан», У. Шекспир «Король Лир», Н. Гоголь «Ревизор», Ч. Айтматов «Хаарыан хампа күѳх кытылым» айымньыларынан испэктээктэр, итиэннэ оҕолорго анаан «Биэс ынахтаах Бэйбэрикээн эмээхсин» остуоруйа-испэктээк Саха тыйаатырын Күннэригэр элбэхтик тоҕуоруспут олохтоох дьон кѳрүүтүгэр тахсан, биhирэбили ыллылар.
Саха артыыстара испэктээктэри таhынан, араас айар бырайыактарга, оскуола оҕолорун кытары кѳрсүhүүлэргэ кытыннылар.
Биир кэрэ-бэлиэ түгэнинэн Ньурба улууhуттан тѳрүттээх артыыстары чиэстээhин буолла. «Ньурба улууhа» МО баhылыгын бочуоттаах грамотатынан СѲ үтүѳлээх артыыската, норуодунай артыыска Изабелла Николаева уонна СѲ үтүѳлээх артыыската Мария Николаева наҕараадаланнылар.
Баhылык махтал суруктарын Саха тыйаатырын солб. дириэктэрэ Владимир Павлов, СѲ үтүѳлээх артыыстара Домна Уйгурова, Михаил Апросимов уонна Маргарита Борисова туттулар. СѲ үтүѳлээх артыыската, норуодунай артыыска Изабелла Николаеваҕа Ньурба куорат дьаhалтатын баhылыгын махтал суруга туттарылынна.
Ону таhынан Ньурба улууhун нэhилиэктэрин баhылыктара бочуоттаах грамоталары бэйэлэрин биир дойдулаах артыыстарыгар туттардылар: Күндээдэ — Владимир Павловка, Маар — Елена Марковаҕа уонна Хаңалас — Варвара Пестряковаҕа.
- 0
- 0
- 0
- 0
- 0
- 0