Кытаанах бөх араас көрүҥүн тутар анал пуун Бүлүүлүүр суол 3 км-гар «Юником» маҕаһыын таһыгар баар. Манна массыына эрэһиинэтин (шина), алюминий бааҥканы, батареяны, пластик матырыйаал арааһын, пластиктан оҥоһуллубут бытыылканы, араас хаппахтары, кумааҕы арааһын уонна хордуоҥканы туталлар. «Добрые крышечки» диэн Бүтүн Арассыыйатааҕы үтүө санаа акциятын чэрчитинэн, пластик бытыылка хаппаҕын тутар анал пуун эмиэ манна үлэлиир.
Экологияны харыстааһыҥҥа сэмэй кылааппын киллэрдим.
“Эко-Партнер” хампаанньа хордуоҥканы, макулатураны, салапааны, пластигы тутар. Аадырыһа: Сэбиэскэй Аармыйа 50 сыла, 53/3
“Сarton company» хордуоҥканы, полиэтилен матырыйааллары, А4 кумааҕыны тутар. Бэл, бэйэлэрэ тиийэн ылыахтарын сөп. Аадырыһа: Заимка уул., 6.
«Trash2Cash» хампаанньа нэһилиэнньэттэн өҥнөөх металлары, аккумуляторы, катализаторы харчыга тутар. Аадырыһа: Билибина уул., 17/1г.
«555” тимир көлө саппаас чаастарын атыылыыр маҕаһыын пластик бытыылкалары харчыга тутар. Аадырыһа: Дежнев уул., 33
«Планета Электро» маҕаһыын алюминий уонна пластик бытыылканы тутар. Автодорожнай уул., 11а диэн аадырыска тиийэн батареяны туттардым.
“Респект” көмпүүтэр тиэхиньикэтин атыылыыр маҕаһыын сервиснэй киинигэр эргэ-урба төлөпүөннэри, планшеттары уо.д.а. туттарыахха сөп. Офистарын иһигэр дьоҕус дьааһык турар. Аадырыһа: Орджоникидзе уул., 47.
Маны сэргэ, матырыйаалы нэһилиэнньэттэн тутан баран, оҥорон таһаарыынан дьарыктанар хампаанньалар бааллара соһутта.
Ол курдук, “Эковата” хампаанньа А4 кумааҕыны уонна хаһыаты тутар. Матырыйааллары переработкалаан, дьиэни-уоту тымныыттан харыстыыр утеплитель оҥорон таһаарар эбит.
Аны туран, Мэҥэ Хаҥалас улууһун Аллара Бэстээҕэр «Чөл сир» диэн пластик матырыйаалга иккис тыыны бэлэхтиир ураты тэрилтэ баар. Хампаанньа нэһилиэнньэттэн туппут кытаанах бөҕүн илдьиритэн баран, тротуар билииккэтин оҥорон таһаарар. Бу сонун хайысха Дьокуускайга кэлэ илик.
Билиҥҥи сайдыылаах үйэҕэ өйбүтүгэр-санаабытыгар тосту уларыйыылар киирэллэрэ уолдьаста. Ким да биһиги бөхпүтүн-сахпытын хомуйан биэрэрин күүппэккэ, хас биирдиибит олорор сирбит-уоппут ыраас буоларын туһугар кыһаллыахтаахпыт. Буортулаах бөҕү хомуйууга улахан үлэ барыахтаах. Хас биирдии киһи бөҕүн-саҕын арааран туттарар буолуохтаах. Бу туһаҕа тахсар кыахтаах эбэтэр иккистээн оҥоһуллан тахсар кыаҕа суох диэннэргэ араара үөрэниэхтээх.
-
0
-
0
-
0
-
0
-
0
-
0
