Вера Арияновна 1947 сыл ахсынньы 29 күнүгэр Дулҕалаах сэлиэнньэтигэр Чукровтар дьиэ кэргэҥҥэ 12-с оҕонон күн сирин көрбүт. Ийэтэ Акулина Павловна ыанньыксыт, аҕата Ариян Степанович кадровай булчут эбит. Сэрии кэннинээҕи аас-туор кырыымчык сыллар кыһалҕалара бу дьиэ кэргэни тумнан ааспатаҕа. Ол курдук, 15 бииргэ төрөөбүттэртэн түөрт эрэ тыыннаах ордон хаалбыт.
--Кыра эрдэхпиттэн улахан дьону кытары тэбис-тэҥҥэ холкуос үлэтигэр сылдьыһарым. Төрөппүттэрбин кытары ынах ыырбыт, сүөһүнү көрөрбүт, оттон сайын оттуу барсарбыт. Ол кэмҥэ Дулҕалаах оскуолата 8 кылаастаах этэ. Онон салгыы Верхоянскай куоратыгар үөрэнэ барбытым, -- диэн Вера Арияновна ахтар.
Сэбиэскэй Сойуус ыччаты кытары үлэтин сиэринэн, “Оскуола - производство – үрдүк үөрэх” диэн тосхолунан, 1967 сыллаахха оскуоланы бүтэрээт, төрөөбүт нэһилиэгэр ыанньыксыттыыр. Биир дойдулаахтара үтүө майгытын уонна кыһамньылаах үлэтин иһин эдэркээн кыыһы ытыктыыллар. Кылгас кэминэн холобурга сылдьар үлэһит буолар. Бу сыл хомсомуолка Вера нэһилиэк дьокутаатынан талыллар. Уопсайа 20 сыл устата дьокутааттыыр. Бу баар буолбаат --- дьон итэҕэлэ, эрэлэ диэн!
Манна даҕатан эттэххэ, 1969 сыллаахха Дьокуускайга Саха АССР үлэһит дьокутааттарын ХII сийиэһигэр, онтон 1971 сыллаахха Саха АССР Үрдүкү Сэбиэтигэр дэлэгээт буолар. Эдэр кыысчаан дьокутаат үлэтин, эбээһинэһин, эппиэтинэһин толору өйдөөн туран, 1974 сыллаахха Дьокуускайга баартыйа үрдүкү оскуолатын бүтэрэр уонна төрөөбүт улууһугар зоотехнигынан үлэлии барар.
--Кэргэним Владимир Иннокентьевич Слепцовтуун 1974 сыллаахха ыал буолбуппут. 10 оҕону иитэн улаатыннардыбыт. Аҕыһа -- кыыс, иккитэ -- уол. Бииргэ 40 сыл эйэ-дэмнээхтик олорбуппут. Хомойуох иһин, 2014 сыллаахха кэргэним күн сириттэн күрэммитэ, - диэн сэһэргэһээччим олоҕун быыһын кыратык сэгэтэр.
Манна даҕатан эттэххэ, билиҥҥи кэмҥэ үстэн элбэх оҕолоох ийэлэр элбэх оҕолоохтор ахсааннарыгар киирсэллэр. Оттон ол кэмҥэ оҕо ахсаана биэстэн элбэх буолуохтааҕа. Оччолорго түбүк олус элбэҕэ. Билиҥҥи курдук, таҥас, иһит сууйар массыыналар суохтара. Ас сылытар, буһарар оһохтор даҕаны мэлигирдэрэ.
Слепцовтар оҕолоро бары олус бүгүрүлэр, ханнык да үлэттэн толлон турбат, үөрэххэ дьаныардаах, бэйэлэригэр ураты ирдэбиллээх дьон. Үлэни өрө тутан улааппыт буолан, олох бары эйгэтигэр ситиһиилээхтэр.Б эйэ-бэйэлэригэр олус сымнаҕас сыһыаннаахтар, куруук өйөбүл, тирэх буолаллар.
Улахан кыргыттар Анастасия уонна Вера -- игирэлэр. Бастакынан идэ ылан, балтыларыгар, бырааттарыгар суолу арыйбыттара, холобур уонна инникитин күүс-өйөбүл буолбуттара. Улахан уол Владимир идэтинэн юрист, Ирина -- инженер-программист, Акулина – мэдиссиинэ сиэстэрэтэ, Арияна – тылбаасчыт. Иитиэх кыыстара Матрена эмиэ юридическай үөрэхтээх. Мария -- ангылычаан тылын учуутала, кыра уол Владимир -- авиатехник, кыра кыыс Нарыйаана – экэнэмиис.
Оҕолор бары төрөөбүт дойдуларыгар тардыһыылаахтар. Үөрэхтэрин бүтэрээт, төрөөбүт улуустарыгар төннөн кэлэн үлэлээн, атахтарыгар туран, мантан кынат анньыммыттара.
Билигин Вера Арияновна үлэнэн ситиһиллибит бочуоттаах сынньалаҥар олорор. Кини өр сыллаах сыралаах үлэтэ, элбэх оҕону улаатыннарбыта дьоһуннаах наҕараадаларынан бэлиэтэммитэ: ССРС хомуньуус баартыйатын Киин Кэмитиэтин Дьокуускайдааҕы обкомун, Үрдүкү Сэбиэт Президиумун грамоталарынан, Саха АССР Миниистирдэрин Сэбиэтин боруонса мэтээлинэн, Ийэ буолуу I, II истиэпэннээх мэтээлинэн, “Ийэ Албан аата” III истиэпэннээх уордьанынан, Дьоруой ийэ, “Гражданскай килбиэн”, «Саха Өрөспүүбүлүкэтин Үрдүкү махтала” бэлиэлэринэн. Маны тэҥэ ийэ хорсун быһыытыгар анаммыт «За укрепление престижа семейного образа жизни» эстафета кыттыылааҕа уонна кыһыл көмүс чаһытын хаһаайката.
Үтүө санаалаах күн күбэй ийэ быйыл 75 сааһын туолар. Биир дойдулаахтарыгар сүбэтинэн, бэйэтин олоҕун тус холобурунан, сымнаҕас майгытынан үтүө суолдьут буолар. Кинини тапталлаах оҕолоро, сиэннэрэ арыаллыыллар, күүс-көмө буолаллар.
Оттон биһиги хоту дойду хоһуун ийэтигэр, үтүө-мааны Вера Арияновнаҕа, кытаанах доруобуйаны, өссө даҕаны чугас дьонуҥ тапталларыгар уйдаран сылдьаргар баҕарабыт уонна эйиэхэ Степан Дадаскинов хоһоонун тылларын аныыбыт:
Мин хотугу ийэкээм,
Минньигэстэй эриэккэс
Хаар нуурала сыттааххын,
Күөл тумана сыттааххын.
Ийээ, сыллаан ылыым дуу,
Ийээ, кууһан ылыым дуу...
Оҕо сааспын саныахпын,
Оҕо буолан ылыахпын.
-
1
-
0
-
0
-
0
-
0
-
0
