Иван Дьяконов, наладчик:
Сүрүннээн кырдьаҕастар уонна тыаҕа олорор дьонум тутталлар.
Айтыына Арчы, бортпроводник:
Туттааччы ахсааннаах. Мин саныахпар, төлөбүрдээҕин иһин буолуо. Урут өрөспүүбүлүкэбит күнүгэр босхо буолааччы. Билигин билбэтим. Тус бэйэм туттабын. Оттон босхону туруоруммат дьон бэйэтэ улахаҥҥа уурбат, быһыыта.
Яков Николаев, систиэмэ администратора:
Туттар дьон ахсааннаах. Улахаҥҥа уурбаттар диэм этэ, «”е”, “у”, “н”, “5”, “ь” да туттан сылдьыллыа» дииллэр.
Николай Осипов, ыстаал уһаарааччы:
Билэр дьонум тутталлар.
Ираида Коркина, бэйиэт:
Алтыһар дьонум улахан аҥаардарыгар сахалыы клавиатура баар. Арай, устудьуоҥка балтыларбар суох.
Сардаана Сыромятникова, блогер:
Үксүлэрэ сахалыы раскладканы туттубаттар. Оннооҕор тылга үлэлиир, чинчийэр дьон. Соруйан сахалыы клавиатура сыылкатын ыытабын, син биир туруорбат дьон элбэх. Дьиҥэр, итини туруорар босхо ээ, элбэх приложение баар.
Сайдам Номад, психиатр:
Мин дьонум улахан аҥаара оннук суруйар курдук - ол эбэтэр нууччалыы буукубанан. Саха клавиатурата төлөпүөннэригэр баар да буоллар, раскладканы уларытарга сүрэҕэлдьээннэр, сороҕор, нууччалыы буукубанан суруйар буолуохтаахтар. Бэйэм да оннук гынабын. Кырдьык, хас да тыл клавиатуралаах буоллаххына, саха клавиатуратын хасыһар мачай соҕус буолааччы. Мин төлөпүөммэр сахалыы клавиатура суох буолан, хаһаахтыы бэчээттээччибин.
Рөйал Сибирли, историк:
Азербайджанныы суруйсууга атын туора буукубалары дэҥҥэ тутталлар дии саныыбын. Арай, "ə" оннугар "e" суруйаллара үгүс. Ол да буоллар, бу наһаа сотору-сотору көстөр кыһалҕа буолбатах.
Ильгизар Мугаев, татаар тылын үөрэхтээҕэ:
Google Play-гэ татаардыы раскладкалаах смартфоҥҥа аналлаах хас да клавиатура баар. Хачайдаан туруорар – биир мүнүүтэлээх дьыала. Көмпүүтэрдэргэ өссө судургу, тоҕо диэтэххэ Windows татаардыы тылбаастаммыта уонна татаардыы клавиатура баар. Ол эрээри, үгүс киһи татаардыы клавиатура баарын билбэт. 70% кэриэтэ оннуктар. Бу дьон суруйсалларыгар татаар алпаабытын ураты буукубаларын баччааҥҥа диэри тумналлар.
-
0
-
0
-
0
-
0
-
0
-
0
