2025 сыл Арассыыйаҕа аҕа дойдуну көмүскээччи сылынан, оттон Саха Өрөспүүбүлүкэтигэр – ийэ дойдуну көмүскээччи сылынан биллэрилиннэ. Кэлэр сылга дойдубутугар сүҥкэннээхэй бэлиэ даатаны – Аҕа дойду Улуу сэриитигэр Кыайыы 80 сылын бэлиэтиибит.
Хаһыат Саҥа 2025 сылы көрсө бырааһынньыктааҕы нүөмэригэр норуот дьокутааттара бу ааһан эрэр сылга туох-ханнык ситиһиилэрин билиһиннэрэллэр уонна Саҥа Дьылынан эҕэрдэлэрин тириэрдэллэр.
Ил Түмэн социальнай бэлиитикэҕэ, үлэҕэ уонна дьарыктаах буолууга сис кэмитиэтин бэрэссэдээтэлэ Алена Атласова:
– Быйыл Арассыыйаҕа Дьиэ кэргэн, Саха Сиригэр Оҕо саас сыла биллэриллибитинэн дьиэ кэргэни өйүүр элбэх быhаарыы ылынылынна, элбэх тэрээhин ыытылынна. Ил Дархан Айсен Николаев элбэх оҕолоох дьиэ кэргэни өйүүр стратегическай быһаарыылары ылла.
Ил Түмэн социальнай бэлиитикэҕэ, үлэҕэ уонна дьарыктаах буолууга сис кэмитиэтин норуот дьокутааттарын көҕүлээhининэн, быйыл ийэ хапытаалын оҕо стоматологическай уонна ортодонтическай өҥөнөн туhанарыгар туттуохха сөп буолла. Ити миэрэ өрөспүүбүлүкэ «Дьиэ кэргэн» ийэ хапытаалын туhаныы хайысхаларын кэҥэтиигэ ыытар үлэбитин ситэрэн биэрдэ. Доруобуйа харыстабылын министиэристибэтин иhитиннэриитинэн 4-14 саастаах оҕолор 80-90 %- нара стоматолог-ортодонт көмөтүгэр наадыйар. Бу кыhалҕа ордук сытыытык тыа сиригэр турар. Онон бу саҥа миэрэ кэнчээри ыччаппыт доруобуйатын харыстыырга туhалаах буолуо.
Мин өбүгэлэрим олорбут Горнай улууhун Өрт сэлиэнньэтигэр буолбут саха норуодунай бэйиэтэ, Саха Сирин гиимин ааптара Савва Тарасов 90 сааhын бэлиэтиир тэрээhинэ биир умнуллубат кэрэ өйдөбүл буолар. Савва Тарасов мин эһээм бииргэ төрөөбүтэ буолар. Төрөөбүт улууhум сылтан сыл аайы тупсан иhэрэ, дьон –сэргэ түмсүүлээҕэ, көхтөөҕө миигин ис сүрэхпиттэн үөрдэр.
Уонна Савва Тарасов үбүлүөйүн чэрчитинэн Платон Ойуунускай аатынан Саха тыйаатырын сыанатыгар үөрүүлээх тэрээhиҥҥэ Горнай улууhун нэhилиэктэрин аҕа баhылыктара биир киhи курдук өрөспүүбүлүкэбит гиимин толорбуттара наhаа долгутуулаах түгэн этэ.
Бастатан туран, баҕа санаа туолуута киһи бэйэтиттэн тутулуктаах. Баҕа санаа туоларыгар, дьулуурдаах, былааннаах уонна эппиэтинэстээх буолуох тустаахпыт дии саныыбын.
-
0
-
0
-
0
-
0
-
0
-
0
