“Бүгүн Сахабыт Сиригэр бэлиэтэнэр сыспай сиэллээхпитин иитэр, күннэтэ түбүгүрэр дьоммут идэлээх күннэринэн истиҥник эҕэрдэлиибин! Биһиги улууспутугар быйылгы сылга уопсайа 12100 сылгы баар. Мантан биэтэ 8090 төбө. Абаҕаҕа сылгы собуоттаахпыт. Кэтэх хаһаайыстыбаларга 4487 сылгы уонна биэ иитиллэн турар. Кэнники сылларга дьон-сэргэ бэйэтигэр дохуот да аахсан сылгыны хото иитэр буолла, интэриэһэ да улаатта. Биһиги сылгыһыттарбыт тыа хаһаайыстыбатын министиэристибэтэ ыытар граннарыгар кыттаннар ыраах үрэхтэргэ аныгылыы сылгы баазаларын тутталлар. Улууспутугар кулун тутар ый ортотугар өрөспүүбүлүкэҕэ Сылгыһыт күнүн көрсө сыллата тэрээһин тэрийэбит, күрэхтэһиигэ барар талыыны ыытабыт.
Амма улууһа өрөспүүбүлүкэҕэ биир сылгы куттаах улууһунан биллэр. Ол курдук холобура Анатолий Баишев салайааччылаах “Давидофф” ХЭТ өрөспүүбүлүкэ үс төгүллээх чемпиона, Василий Тимофеев бэрэссэдээтэллээх Строд аатынан хаһаайыстыба иккис миэстэни ылан тураллар. Быйыл Сылгыһыт күрэҕэ Мэҥэ Хаҥалас улууһугар Хара сэлиэнньэтигэр ыытыллар. Бүгүн онно сылгыһыттар мунньахтыахтара. Сарсын дьэ ыһыылаах-хаһыылаах күрэхпит саҕаланыа. Манна биһиги улууспутун “Давидофф” ХЭТ хамаандата уонна “Бөтүҥ” хаһаайыстыбата көмүскүөхтэрэ. Өссө төгүл улуус бары сылгыһыттарын бырааһынньыгынан истиҥник эҕэрдэлиибин, ситиһиилэри баҕарабын. Сарсыҥҥы күн күрэхтэһээччилэрбитигэр соргулаах буоллун!”.
Хаартыска: "Амма олоҕо" хаһыат архыыбыттан
-
0
-
0
-
0
-
0
-
0
-
0
