Манна үнүстүүт үлэһиттэрэ ирбэт тоҥу дьиҥнээх усулуобуйаҕа, сир аннынааҕы шахталарга үөрэтэллэрин туһунан олус сэргэх кэпсээни билим сотруднига Михаил Васильев оҥордо, онон отой кырачаан да оҕолору умсугутта.
Оҕолор былыргы сэлии уҥуохтарын, ол иһигэр 1977 сыллаахха булуллубут Дима сэлии оҕотун макетын көрдүлэр, билистилэр. Былыр үйэҕэ олоро сылдьыбыт кыыллар тугунан аһаабыттарын сэргээтилэр. Сэлии түөрт эрэ тиистэҕин, отунан-маһынан эрэ аһыырын билэн олус соһуйдулар.
Сир араас көрүҥнэрин уонна ирбэт тоҥҥо тыһыынчанан сыл сыппыт сиэмэттэн үүннэриллибит үүнээйи хаартыскаларын көрдүлэр.
Оҕолор Шергин шахтатын кыччатыллыбыт макетын олус сэргээтилэр. Бу Дьокуускайга баар ирбэт тоҥу чинчийэр аан дойдуга бастакы научнай үнүстүүт олоҕуруутугар олук буолбут тутуу. Үһүйээн быһыытынан, Великий Устюг куораттан төрүттээх атыыhыт Ф. Шергин 1828-1837 сыллар усталарыгар, бастаан утаа уу баһарыгар холуодьас хаһан иһэн, ирбэт буорга иҥнэн, 116,6 м дириҥнээх (саамай түгэҕэр баар скважинатын кытта 140 м) шахтаны хаспыт. Бу кэмтэн ирбэт тоҥу үөрэтии дириҥник саҕаламмыт.
Үнүстүүт саамай улахан соругунан ирбэт тоҥ, климат уларыйыытын уонна хотугу дойду тутууларын чинчийэр.
Ыспыраапка: аан дойдуга кураанах сир 25%- нын ирбэт тоҥ бүрүйэр. Оттон Арассыыйа сирин-уотун 65% ирбэт тоҥ үрүгэр «турар». Ол иhин, ирбэт тоҥу үөрэтээри, 1960 сыллаахха Арассыыйа Наукатын Академиятын Сибиирдээҕи салаатын П.И. Мельников аатынан ирбэт тоҥ үнүстүүтүн аспыттара. Ол иннинэ, 1941 сыллаахха, ирбэт тоҥу үөрэтэр станция баар этэ.
-
4
-
3
-
0
-
0
-
0
-
0
