Бу күн мустубут аҕам саастаах дьоммутун Ил Түмэн дьокутаата Александр Корякин, «Амма түмсүү» салайааччыта Александр Кузьмин эҕэрдэлээтилэр, махтал суруктары туттардылар. Үөрүүлээх тэрээһини аммалар киэн туттар айар куттаах дьоммут СӨ үтүөлээх артыыската Екатерина Захарова, Иван Иванов — Ванс уонна Екатерина Новикова-Дьулуура ылбаҕай ырыаларынан киэргэттилэр. Түмсүү актива улуус историятыгар, сэрии кэминээҕи чахчыларга анаммыт уонна байыаннай ырыаларынан викторина оонньотон, ретро-модаҕа, үҥкүүгэ күрэх ыытан сэргэхситтэ. Хас биирдии кэлбит ыалдьыкка илиинэн оҥоһуллубут георгиевскай ленталаах значок, ону тэҥэ аккырыыкка туттарылынна. Бу курдук, «Амма түмсүү» актива сылын аайы бэтэрээннэри түмэн сэргэхситэн, Кыайыы күнүн уруйдаан-айхаллаан көрсөбүт. Аҕам саастаах дьоммут кэлэн көрсөн, кэпсэтэн, дойдуларын ахтылҕанын таһаараллар.
“Түмсүү салайааччыта Кузьмин Александр Николаевич, өрүү үөрүүнү үксэтэр кэрэ далбардарбыт Ульяна Афанасьевна Иванова, Марина Валерьевна Корнилова, Людмила Васильевна Николаева бары көх — нэм буолан сэргэстэһэн, саастаах дьоҥҥо ытыктабыл көрсүһүүгэ араас оонньуулары ыытан, остуол тардан үтүмэн үөрүүнү, дуоһуйууну бэлэхтээбиккитигэр сүдү махтал”, — диэн этэр Анастасия Захарова.
Бу курдук Дьокуускайга олорор биир дойдулаахтары түмэр түмсүү сыллата Кыайыы күнүн көрсө бэтэрээннэрин ыҥыран сэргэхситэрэ үтүө үгэс буолан өссө да сайда турдун.
Сонун төрдө уонна хаартыска: "Амма олоҕо".
-
0
-
0
-
0
-
0
-
0
-
0
