Олор – урукку-былыргы олохпут кэрэһиттэрэ. Ааспыт үйэтээҕи тутуулар буолан, эргэрэн, эмэҕирэн эрэллэр. Билигин ол иһин чөлүгэр түһэрэр, сөргүтэр үлэ барар.
Былырыын “Сохраним памятники” аахсыйанан Ил Дархан Айсен Николаев дьиэ кэргэнэ бэйэтин үбүгэр миэлиҥсэни өрөмүөннэппитэ. Оттон быйыл Нолуок сулууспатын Саха сиринээҕэ салаата “Утум” дизайн-устуудьайатынан мас ураһаны реставрациялатта. Үлэ 2,5 ый устата ыытылынна.
Бу аҕыс кырыылаах мас ураһа аанын үрдүгэр “1867” диэн охсуу бэлиэлээх. Ону саастаах өттө: “Тутуута саҕаламмыт күнэ-дьыла”, -- диэн быһаарар. Дьохсоҕон нэһилиэгин Куруйа сайылыгар турбутун, музейы тэрийэллэригэр 1977 сыллаахха көһөрөн аҕалбыттар.
Ураһа намыһах буолан, өҥүрүк куйааска да сөрүүн. Аҕыс кырыытын эргийэ наара ороннордоох, утуйар сирэ быыстаах. Ол хаппахчы курдук хоско “1894” диэн суруктаах. Бука, тутууну ситэрэн-тупсаран бүтэрбит сыллара буолуо.
Үһүс үйэтин уҥуордаабыт ураһа, ардах-хаар, сиик-силбик дьайан, сыл-хонук баттаан, аллара ньимиччи түспүтүн, музей үлэһиттэрэ тирээбилинэн өйөөн, таттаран, хата, сиҥнибэккэ тураахтаабыт.
Саҥардыллыбыт мас ураһаны арыйыы үөрүүлээх тэрээһинэ атырдьах ыйын 7 күнүгэр буолла. Онно кыттыыны СӨ Бырабыыталыстыбатын бэрэссэдээтэлин солбуйааччы э.т. С.В. Местников кэлэ сырытта.
Ааспыт кэм туоһуларын кэнчээри ыччакка көрөн-харайан хаалларар маннык үйэлээх үлэ үксээтин, үтүө дьыала элбээтин.
-
0
-
0
-
0
-
0
-
0
-
0
