Бырдах сүөһүгэ, окко уустуктары үөскэтэр. Отчуттар да, сүөсүһүттэр да сайын устата олус ыарахан үлэҕэ сылдьаллар. Ону биһиги бэйэбит үлэлээн, эппитинэн-хааммытынан биллибит.
Саамай бырдахтаах кэмҥэ ньирэй көрөөччү көмөлөһөөччүтүнэн биир ыйга кэпсэтиһэн үлэлии сылдьабыт. Мин уонна дьүөгэм, Х кылаас үөрэнээччитэ Винокурова Нарияна буоламмыт Созонова Раиса Николаевнаҕа көмөлөһөбүт. Ньирэйдэрбит 20-лэр, оттон торбосторбут 51-дэр. Онон уопсайа холбоон 70-ча төбөлөөхпүт.
Ньирэйдэрбит саахтарын ыраастаан, тэлликтэрин уларытабыт, үүт сыаҕыттан холбуллубут үүтү таһан, хас биирдиилэрин суосканан аһатабыт. От киллэрэбит. Бырдахтан, куйаастан хотоҥҥо сынньатан сойутабыт. Аан бастаан үлэлиирбитигэр Раиса Николаевна ыйан-кэрдэн биэрэрэ, сүбэлиирэ. Ол саҕана кыратык ыарырҕаппыппыт. Билигин үлэбитин сөбүлээтибит, сатаатыбыт. Торбосторбутун олус таптыыбыт, хас биирдиилэрин ааттарынан араартыыбыт. Оттон аан бастаан көрдөххө, бары биир курдук этилэр.
Сүөһүгэ үлэлиир олус сылаалаах уонна эппиэтинэстээх эбит, тоҕо диэтэххэ манна сынньалаҥ диэн суох. Күн аайы бириэмэни куоттарбакка үлэҕэр баар буолуохтааххын, тыыннаах харамайы аччыктатар дуу, утатыннарар дуу, эбэтэр инчэҕэйгэ, киргэ тутар сатаммат. Фермаҕа үлэлиир дьон наһаа бэриниилээх уонна тулуурдаах эбиттэр, кыһын тымныыны, сайын куйааһы уонна бырдаҕы аахсыбакка, күн аайы сынньалаҥа суох үлэлииллэрин сөхтүбүт.
Сотору үлэбит түмүктэниэ. Торбосторбутун сайыһа, таптыы арахсыахпыт. Үлэбит хамнаһын аахсыахпыт. Сайыммытын туһалаахтык атааран эрэрбититтэн астынабыт.
Күннэй Винокурова, XI кылаас,
Өлөөкө Күөл, Орто Халыма.
-
0
-
0
-
0
-
0
-
0
-
0
