Бэс ыйын 22 күнүгэр буолбут СӨ бырабыыталыстыбатын мунньаҕар гаастааһыҥҥа субсидия көрүллэр 8 пилотнай нэһилиэнньэлээх пууннары быһаарбыттар: Чурапчы улууһун Дириҥ, Толон, Туора Күөл, Үрүҥ Күөл, Чурапчы сэлиэнньэлэрэ, Бүлүү улууһун Эбэ, Горнай улууһун Бэрдьигэстээх сэлиэнньэлэрэ уонна Ленскэй куорат.
СӨ одькх уонна энергетикатын министиэристибэтэ быһаарбытынан, Чурапчы улууһун Туора Күөлгэ киин ититии ситимигэр холбоммут 11 дьиэҕэ өрөспүүбүлүкэ бүддьүөтүттэн сылын аайы 3 мөл. 552 тыһ. солк. ороскуоттанар. Өскөтүн бу сууманы 11 дьиэҕэ түҥэттэххэ, хас биирдии хаһаайыстыбаҕа 333 тыһ. солк. ыытыллара тахсан кэлэр. Оттон Бэрдьигэстээх киин ититиигэ холбоммут дьиэлэрин көрүүгэ-истиигэ сылга 256 мөл. солк, Чурапчы сэлиэнньэтигэр – 145 мөл. солк, Дириҥҥэ – 41 мөл солк. ыытыллар. Бырагыраама сыалынан-соругунан чааһынай дьиэлэри экологияҕа хорумньута уонна олус ороскуота суох ититии көрүҥүгэр көһөрүү буолар.
«Пилотнай бырайыакка гаастааһын ыытыллар, ол эрээри киин ититиилээх уонна онно холбоммут дьиэлэрдээх нэһилиэнньэлээх пууннары киллэрдибит», -- диэн СӨ одькх уонна энергетикатын миниистирин бастакы солбуйааччы Михаил Кириллин мунньахха иһитиннэрбитин СӨ баһылыгын уонна бырабыыталыстыбатын пресс-сулууспата суруйар.
Бырагырааманан олохтоох дьон олорор дьиэлэрин гаастааһыныгар ыыппыт ороскуоттарын 75%-нын судаарыстыба уйунар, ол эрээри бу суума 117 тыһ. солк. элбэх буолбат. Субсидияҕа киирсэллэр: учаастакка гаас ситимин тардыы үлэтин толуйуу, гаас оһох, билииккэ, счетчик атыыласпыт ороскуоттара уонна оборудованиены туруоруу үлэтэ.
Субсидияҕа сайабылыанньаны «Агенство по развитию промышленного потенциала» судаарыстыбаннай казеннай тэрилтэҕэ ирдэниллэр докумуоннары кытары кумааҕынан эбэтэр электроннай ньыманан биэриэхтэрин сөп.
-
0
-
0
-
0
-
0
-
0
-
0
